Inter përgatitet për ndeshjen e kthimit në gjysmëfinalet e Champions League, në derbin që do të luhet sot në mbrëmje në “San Siro” ndaj Milan. Zikaltërit do të mbrojnë avantazhin 2-0 që kanë ndaj kuqezinjve, në një ndeshje që pritet me shumë interes.
Alessandro Bastoni, pak orë nga sfida e madhe, duke folur për mediat nga qendra stërvitore Appiano Gentile, shprehet: “Rruga nga qendra stërvitore në San Siro do të jetë disi interesante, por në përgjithësi njësoj si herët e tjera. Për mua do të jetë njësoj si atëherë kur u përgatitëm ndaj Benfica”.
“Është thjesht një ndeshje futbollit dhe duhet përjetuar si e tillë, me gjithë gëzimin e dashurinë që provojmë për këtë sport. E rëndësishme është të ruajmë ekuilibrin, pasi e dimë që do të jetë një tjetër betejë e fortë. Ata janë përgatitur për përmbysje, për të rikuperuar”, tha Bastoni.
“Gjithsesi, edhe ne jemi gati për t’i përballuar, duke qenë të përqendruar te loja jonë. E dimë se çfarë duhet të bëjmë, pasi forca e këtij ekipi është grupi. Jemi të vetëdijshëm për forcën që kemi dhe e dimë se vetëm duke qenë të bashkuar do të përjetojmë emocione e kënaqësi të mëdha”, tha Bastoni.
.