Lele Adani komentoi për La Gazzetta dello Sport finalen e Champions League e cila do të luhet më 10 qershor në Stamboll dhe ku do të përfshihen Manchester City dhe Inter Milan.
“A duhet të shqetësohet Interi pasi City mundi Realin 4-0? Aq sa duhet. Skuadra e Inzaghit është gati për këtë sfidë dhe është përmirësuar pikërisht në momentin më të rëndësishëm të sezonit, falë edhe vuajtjeve të muajve të kaluar.
“Më pas kundër emrave të mëdhenj në Europë, tashmë ka treguar se mund të luajë ndeshje të shkëlqyera. Kur Interi luan në maksimum, në aspektin e aplikimit, formës dhe vëmendjes, ata mund t’i mundin të gjithë”, tha Adani.
“Si mundet City? Pyetje e mirë… Unë mendoj se Interi nuk do të jetë në gjendje të dalë nga natyra që ka. Kuptohet se zotërimi do të jetë më shumë prerogativë e skuadrës së Guardiolës, por në vitin 2023 nuk mund të mendohet ta lësh kundërshtarin të luajë dhe kaq.
“Në rastet kur ke topin, duhet të jesh në gjendje ta luash atë me cilësi. Interi është i mirë në këtë: për sa i përket aftësisë së tyre për të dalë nga prapa, zikaltrit kanë diçka ‘guardioliane’.
“Në skuadrën e Inzaghit janë njëmbëdhjetë ‘ndërtues’ dhe ‘marrës’, të gjithë marrin pjesë në lojë, tamam si te City. Por unë do të shkoj më tej: do të jetë e nevojshme të kesh diçka nga 16 lojtarët në dispozicion, sepse loja e Guardiolës të sfilit dhe zëvendësimet do të nevojiten për të mbajtur ritmin”.
Për Cityn dhe Guardiolën: “A do të ketë presionin për të fituar? Unë mendoj se Guardiola e di se ai tashmë ka bërë arritjen më të komplikuar, që është të fitojë (me kampionatin aktual) 5 herë në Premier League në 7 vjet.
“Është diçka e pabesueshme, që shkon përtej fitimit të një Champions League. Më pas në konferencë për shtyp Pep luan me fjalën ‘dështim’, por a mund të besojë vërtet dikush që një Manchester City i mposhtur në finale heq diçka nga puna e bërë nga trajneri katalanas deri tani?”.
.