Vdes edhe një person pas rrokullisjes me traktor, shtohen rastet e tilla

Brenda pak ditësh dy persona nga komuna e Suharekës kanë humbur jetën në mënyrë tragjike.

Ata në raste të ndara kanë vdekur pas rrokullisjes me traktor, gjatë kohës sa punonin.

Mbrëmjen e djeshme në urgjencën e Suharekës, pavarësisht angazhimit të stafit, një person rreth moshës 60-vjeçare, nuk ka mundur tu mbijetojë plagëve që i mori nga rrokullisja me traktor.

“Kam marrë thirrje nga policia. Ekipi ka shkuar në vend të ngjarjes e ka gjet pa shenja jete. E kemi sjellë këtu në emergjencë. Kemi bërë metodën e reaniminimit, por ka qenë pa shenja jete, jemi munduar ta shpëtojmë, por nuk kemi mundur”, ka thënë mjeku, Ilir Sopaj, mjek.

Apel tek qytetarët që të kenë më shumë kujdes kur përdorin mjetet e tilla, bën edhe zëdhënësi i Policisë së Prizren Vesel Gashi.

“Pas pranimit të informacionit, ekipet relevante kanë dalë në vend të ngjarjes dhe i kanë ndërmarrë të gjitha veprimet konform ligjit. Është njoftuar prokurori i shtetit dhe me urdhër të tij trupi i pajetë është dërguar në IML për obduksion” ka thënë Gashi.

Ai shton se policia tashmë ka ndërmarrë te gjitha masat për të hetuar rastin e fundit.

Pak ditë më parë në të njëjtën mënyrë, humbi jetën edhe ish-pjesëtari i UÇK-së, Kapllan Beqa./RTV Dukagjini/