Hetimet për policin e përfshirë në trafikun e drogës, AMP zbulon Call Center-in që mashtronte italianët
Agjencia e Mbikëqyrjes Policore, në kuadër të hetimeve për ngjarjen e ndodhur pak ditë më parë, ku u ndaluan disa persona, ndër to edhe një punonjës policie ka gjetur një ‘Call Center’ në pronësi të Shkëlqim Ostenit.
Policia zbuloi përmes zbërthimit të celularëve të sekuestruar, një Call Center në të cilën mashtrohej me bursën Forex kryesisht ndaj qytetarëve italianë. Sipas AMP, operatorët përfitonin me mashtrim nga 500 deri në 30.000 euro për person.
“Agjencia e Mbikëqyrjes Policore (Rajoni Tiranë) ka vijuar hetimet e thelluara mbi personat e përfshirë në ngjarjen e datës 21.03.2024, ku u ndalua një punonjës policie dhe u arrestuan në flagrancë 3 shtetas të tjerë dhe pas këqyrjes së detajuar të komunikimeve telefonike mes tyre dhe personave të tjerë, deklarimeve të disa personave që tregojnë rrethana të hetimit, si dhe këqyrjes së pamjeve filmike të administruara, është bërë e mundur gjetja dhe kontrolli i një ambienti të përshtatur si Call Center, në pronësi të shtetasve M.H. (i shpallur në kërkim) dhe SH. O., i ndodhur në rrugën “Idriz Guri” Tiranë, në të cilin ushtrohej aktiviteti i paligjshëm i mashtrimit me bursën FOREX.
Gjatë kontrollit të ushtruar në këtë ambient, janë sekuestruar në cilësinë e provës materiale, dokumente, pajisje të ndryshme dhe disa njësi kompjuterike, në të cilat ishin të instaluara programe/aplikacione dhe lista emrash me numra italianë, të cilët kontaktoheshin nga disa operatorë, duke i mashtruar për investime në bursë, nëpërmjet të cilave arrinin të përfitonin vlera monetare të konsiderueshme, që variojnë nga 500 deri në 30.000 euro.
Mbi bazën e materialeve hetimore të administruara deri në këtë fazë i është relatuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, caktimi i masës së sigurimit personal me karakter shtrëngues, në mungesë, për shtetasit M. H., 33 vjeç, i dyshuar për veprën penale “Mashtrim kompjuterik” i kryer në bashkëpunim, si dhe regjistrimin e të njëjtës vepër për personin nën hetim SH. O., i arrestuar më parë si i dyshuar për veprën penale “Prodhim dhe shitje narkotikësh”.
Hetimet vijojnë për identifikimin e plotë të të gjithë personave të perfshirë në këtë veprimtari dhe dokumentimin me prova ligjore të veprave penale, ku dyshohet se ata janë të përfshirë,”– njofton policia.
Kujtojmë se “Arrest në Burg” ka vendosur Gjykata e Tiranës edhe për 3 të arrestuarit e tjerë, mes tyre dhe efektivi i operacionales Ervis Shkurta.
Për Enea Sulejmanin konkretisht Gjykata e Tiranës caktoi “burg pa afat”, ndërkohë “arrest me burg” me afat deri në 16.05.2024 për Igli Begaj, Shkëlqim Osteni dhe efektivin e policisë Ervis Shkurtan.
Lexo edhe: U kap me 1 kg kokainë e përplasi makinën e policisë, burg pa afat për Enea Sulejmanin
Eneo Sulejmanaj, së bashku me dy shtetas të tjerë Igli Begaj dhe Shkelqim Ostreni po trafikonin 1 kilogramë kokainë në momentin që u arrestuan në flagrancë në kryeqytet. Në dosjen hetimore e arrestimeve të 22 marsit, ishte i përfshirë dhe efektivi i operacionales në Drejtorinë e Përgjithshme të Policisë së Shtetit Ervis Shkurta.
Efektivi i Operacionales, Ervis Shkurta ka mohuar përfshirjen në ngjarje duke pretenduar se nuk është ai poseduesi i numrit Britanik me pseudonimin “Visi i Pazarit” që kanë pretenduar të dyshuarit e tjerë.
Po ashtu ai ka kërkuar lirinë edhe për shkak të problemeve shëndetësore që ka një nga fëmijët e tij.
Mbrojta ka kërkuar masë më të butë sigurie, po ashtu mohon faktin që ata të kenë pasur dijeni për drogën. Mbrojtja e Ervis Shkurtës pretendon se nga raportet e policisë nuk del që të përmendet emri i efektivit Shkurta.
Edhe pse emri i Ervis Shkurtës nuk del në raportet e policisë, prokuroria ka kërkuar që ta lërë në qeli duke argumentuar se ka prova të mjaftueshme për të vërtetuar dyshimin e arsyeshëm.
Policia ra në gjurmët e policit Ervis Shkurta pasi deklarimin për këtë shtetas e ka dhënë i dyshuari për trafik, Shkëlqim Ostreni në deklaratat para oficerëve të policisë dhe prokurorisë. Ky i fundit ka deklaruar se ka njohje me shtetasin Ervis Shkurta që është punonjës policie. Luanin të dy kalceto.
“Kam punuar te lokali që ka shtëpinë Visi, në afërsi të Pazarit të Ri, me emrin restorant “Dada”, – ka thënë Ostreni para oficerëve. Madje Ostreni, pas kqyrjes së celularit, e kishte shënuar policin me nickname “Visi Pazar”.
Këtij rekordi i bashkëlidhet një numër telefoni anglez. Të dy, pra i arrestuari dhe polici kanë filluar komunikimet mes tyre që nga dita e enjte, në 20 mars. Bisedat sipas policisë, lidhen me tregëtimin e lëndës narkotike.
Ditën e premte, bisedat mes tyre vazhdojnë me orarin kur do të shitej lënda narkotike e sekuestruar tanimë. Polici Ervis Shkurta shkruan: “Ok, më thuj kur të mbaroni punë vllai, po, he vllai kryt punë?”
Në vijim, nga ora 22:36 deri në orën 23:15 të mbrëmjes së të premtes Ervis Shkurta i ka dërguar 4 thirrje pa përgjigje në aplikacionin Whatsapp, kohë në të cilën Shkëlqim Ostreni ishte bllokuar nga shërbimet policore. Policia pas kësaj shkon dhe gjen policin Ervis Shkurta. I sekuestron celularin e tij të markës Samsung S20+.
Polici Shkurta tregon se e njeh Shkelqimin që prej 3-4 vitesh, por nuk pranon të sqarojë bisedat në aplikacionin Whatsapp.
“Nuk kam pasur asnjëherë ndonjë numër anglez në përdorim” – thotë ai, një numër që nuk është gjetur deri tani, sepse celulari që sekuestroi policia ka një kartë sim 069…….321.
“Jam takuar me Shkëlqimin në datën 20 mars. Ka qenë i shoqëruar me një tjetër person dhe udhëtonte me një Audi me ngjyrë të zezë tek rrethi pranë qendrës Stefan. Personin tjetër nuk e njoh. Biseduam pak dhe u ndamë” – thotë polici që nuk pranon të ketë dijeni për drogën apo tregtimin e saj.
Kapja e 1 kilogrami kokainë ndodhi të premten. Kamerat e sigurisë së hotel Theatro dhe dy subjekteve përballë tij shfaqin të gjitha veprimet e policisë, ku mbeti i plagosur në këmbë shtetasi Eneo Sulejmanaj që tentoi t’i ikte policisë pasi në makinë kishte lëndën narkotike. Punonjësi i policisë ka pretenduar në hetim se arma ka bërë shkrepje të pavullnetshme kur e nxorri atë pasi shtetasi Eneo Sulejmanaj nuk po bindej të ndalonte makinën. Operacionalja ka qenë në ndjekje të veprimeve të policisë për ndalimin e makinës.