VIDEO / Miqësoret: Italia “ngec” ndaj Turqisë, Austria mund Serbinë
Favoritët kryesisht nuk kanë zhgënjyer, pavarësisht se ka patur edhe rezultate surprizë. Kjo është “pasqyra” e rezultateve, të sfidave përgatitore, para “Euro 2024”, me Austrinë e Portugalinë, që kanë gjetur fitoret përballë kundërshtarëve, Italia ka barazuar me Turqinë, ndërsa Hungaria është mundur nga përfaqësuesja e Irlandës.
Kështu, në “Ernst Happel Stadion”, të Vjenës, kombëtarja e Austrisë ka mundur me rezultatin e ngushtë, 2 me 1, Serbinë. Gjithçka u “vulos” brenda minutës së 35’-të, ku për vendasit shënoi Patrick Vimer e Kristof Baumgartner, ndërsa Pavlovic, ngushtoi shifrat dhe “hipotekoi” humbjen e përfaqësueses së tij.
“Luzitanët” e Portugalisë, pa prezencën e “yllit” të tyre, Kristiano Ronaldo arritën një fitore të madhe, 4 me 2, ndaj Finlandës. Ruben Dias, Diogo Zhota dhe “ylli” i Man. Junajtedit, Bruno Fernandes, me një dopietë në minutat 55’ e 84’ shënuan për skuadrën e teknikut, Roberto Martinez, duke nxjerrë të pavlefshme dygolëshin e finlandezit, Teemu Puki.
Hungaria ka zhgënjyer totalisht në “Aviva Stadium”, të Dublinit, teksa janë mundur me rezultatin e ngushtë, 2 me 1, nga kombëtarja e Irlandës. Adam Idah dhe Troj Parot regjistruan një fitore të madhe për vendasit, ndërsa për miqtë hungarezë nuk mjaftoi goli i Adam Lang, për të siguruar qoftë edhe një barazim, në këtë transfertë të vështirë.
Ndërkaq, në “Stadio Renato Dall’Ara”, “Të Kaltërit” e Italisë kanë zhgënjyer totalisht, ku kanë regjistruar një barazim të bardhë pa gola, përballë Turqisë, me një lojë “të dobët” dhe pa shumë dinamikë, performancë, e cila është e sigurt se nuk do të mjaftojë përballë Shqipërisë, në sfidën e parë të “Euro 2024”, më 15 qershor.
