Pasaporta kosovare, Qëndrim Ismajli nuk udhëton drejt Gjeorgjisë me KF Tirana
Skuadra e Tiranës do duhet të bëjë pa mbrojtësin Qëndrim Ismajli. Futbollisti i afruar gjatë merkatos së verës tek bardheblutë nuk ka mundur që të udhëtojë drejt Gjerogjisë për ndeshjen e parë që kryeqytetasit kanë me Torpedo Kutaisi.
Gjeorgjia nuk e njeh Kosovën dhe duke qenë se Ismajli ka vetëm pasaportë kosovare, nuk është lejuar të udhëtojë drejt shtetit gjeorgjian. Dokumentacioni i paraqitur për lojtarin nuk ka qenë i mjaftueshëm që të kalonte për të udhëtuar me skuadrën e në të tilla rrethana, trajneri Bledi Shkëmbi do të ketë një lojtarë më pak për ndeshjen e parë me Torpedo Kutaisi.
Kjo nuk është hera e parë që skuadrat shqiptare përballen me probleme të tilla, ku lojtarëve nga Kosova ose vendet e huaja nuk lejohen të udhëtojnë në shtete të ndryshme. Tirana e luan të enjten ndeshjen e saj të parë në Ligën e Konferencës në orën 19:00 në Kutaisi, ndërsa sfida e kthimit do të luhet pas një jave, por mbetet për t’u caktuar se ku do të zhvillohet pasi “Air Albania” ka fushën e dëmtuar, ndërsa “Selman Stërmasi” është prej kohësh jo funksional.
