Simon: Unë isha nervoz, ndërsa ata të dy këndonin e kërcenin në autobus

Portieri i Spanjës, Unai Simon, kujton emocionet e finales së “Euro 2024”, ku kombëtarja e tij fitoi 2-1 ndaj Anglisë, duke ngritur lart trofeun. Ai pranon se para sfidës ka qenë nervoz, por jo të gjithë ishin si ai.

“Si Niko Uilliams ashtu dhe Lamine Jamal ishin shumë të rëndësishëm për ne në këtë Kampionat Europian. Jo vetëm për atë që bënë në fushë, por edhe për atë që i përcjellin grupit”, u shpreh Unai Simon për mediat vendase.

Më tej, portieri i Atletik Bilbaos u shpreh se ishte nervoz në prag të finales në Berlin.

“Këta dy fëmijë ishin afër nesh. E dija se duhej të luaja në një finale të Kampionatit Europian dhe isha nervoz në autobus. Ndërsa ata të dy po kërcenin, po shijonin çdo moment. Ata e duan futbollin, e shijojnë çdo moment dhe duke i parë të jep qetësinë shpirtërore për të thënë se nuk ka nevojë të jemi nervozë. Duhet ta përballojmë jetën si ata, me gëzim, me përgjegjësi”, u shpreh Unai Simon.