
“Djajtë e Kuq” gati ofertën 100 mln euro për mbrojtësinë e Barcelonës
Klubi anglez, Mançester Junajted ka etiketuar mbrojtësin e Barcelonës, Ronald Arauho si njërin nga objektivët kryesor të verës dhe është gati të bëjë një ofertë të lartë për të.
Sipas mediumit “Fichajes”, Junajted është gati të bëjë një lëvizje të fortë në afatin kalimtar të verës, duke synuar Arauhon me një ofertë prej 100 milionë euro.
Qendërmbrojtësi uruguaian ka qenë një figurë kyçe për Barcelonën dhe konsiderohet si një nga mbrojtësit më të mirë të Evropës. Pavarësisht nënshkrimit të një zgjatjeje kontrate deri në vitin 2031, gjendja financiare e klubit mund t’i detyrojë ata të marrin në konsideratë një ofertë të madhe.
Në janar, Juventusi bëri një përpjekje për ta nënshkruar atë, por oferta e tyre nuk ishte në vlerën e Barcelonës. Junajtedi, nën drejtimin e Ruben Amorimit, e sheh Arauhon si liderin ideal në mbrojtje, megjithëse konkurrenca për nënshkrimin e tij do të jetë e ashpër.
Aftësia e tyre për të siguruar kualifikimin në Ligën e Kampionëve përmes Ligës së Evropës mund të luajë një rol vendimtar në ndjekjen e tyre. Në fund të fundit, Barcelona dhe vetë Arauho do të vendosin nëse një transferim do të realizohet.