41 vjeçari nga Maqedonia kapet në Tiranë, kërkohej për disa vepra të rënda në Austri (FOTO)
Një 41-vjeçar nga Maqedonia e Veriut është vënë në prangat e Policisë Shqiptare, pas një operacioni të koduar “Operacionalja 54”, zhvilluar nga strukturat e Forcës së Posaçme Operacionale.
Burime zyrtare nga Policia bëjnë të ditur se i arrestuari, shtetasi M. A., lindur dhe banues në Shkup, ishte i shpallur në kërkim ndërkombëtar nga autoritetet austriake, për disa vepra të rënda penale, përfshirë: trafikim droge, kërcënim i rrezikshëm, zhvatje e rënduar, dhe plagosje. Ndaj tij është lëshuar një urdhër arresti nga Zyra e Prokurorit Publik në Innsbruck, Austri, ndërsa legjislacioni penal austriak parashikon deri në 20 vjet burg për këto shkelje.
Gjatë arrestimit në Tiranë, policia i gjeti dhe sekuestroi një sasi lënde të dyshuar narkotike kanabis, e cila u mor në cilësinë e provës materiale.
Interpol Tirana ka nisur procedurat ligjore për ekstradimin e 41-vjeçarit drejt Austrisë, në bashkëpunim të ngushtë me autoritetet austriake.
Operacioni “Operacionalja 54” vjen si pjesë e aksioneve të vazhdueshme të Policisë së Shtetit për kapjen e personave të rrezikshëm të shpallur në kërkim ndërkombëtar.
