Luiz Ejlli emocionon me mesazhin për ditëlindjen: “Ju dua për mënyrën si më bëtë të ndihem
Në një nga netët më të paharrueshme të jetës së tij, Luiz Ejlli festoi 40-vjetorin e lindjes mes emocioneve të mëdha dhe dashurisë së pafundme nga publiku, familjarët dhe fansat që i qëndrojnë pranë ndër vite.
Pas festës, Luizi ndau një mesazh prekës në rrjetet sociale, ku falënderon të gjithë ata që e kujtuan dhe e surprizuan në këtë ditë të veçantë, duke e përshkruar si një kujtim që do ta mbajë në zemër përjetë:
Ka ditë që kalojnë dhe harrohen, por ka edhe ditë që futen thellë në shpirt dhe nuk dalin kurrë prej aty. Dita ime e lindjes këtë vit ishte pikërisht një nga ato net që i thua vetes: mbaje mend mirë, sepse ky moment nuk vjen më.
Dua të falënderoj nga zemra çdo njeri që më kujtoi – çdo urim, çdo mesazh, çdo fjalë e shkruar me dashuri dhe jo nga detyrimi. Çdo dhuratë që nuk ishte thjesht materiale, por e mbushur me kujdes, mendim dhe ndjenjë.
Ka një moment që mbrëmë ma ndali frymën. Isha në skenë duke kënduar dhe, papritur, qielli foli. Një dron, një dritë, një mesazh në ajër: ‘Gëzuar ditëlindjen’. Mu dridh zëri, lotët nuk kërkuan leje – thjesht erdhën. Sepse ajo nuk ishte thjesht një surprizë, ishte një shpërthim dashurie që më mbajti pezull në ajër, pa më lënë të prek tokën.
Më dhatë një kujtim që do ta mbaj deri në ditën e fundit – jo në telefon, jo në Instagram, por këtu, ku rreh fort. Faleminderit që më treguat se nuk jam vetëm. Ju dua jo për atë që më dhatë, por për mënyrën se si më bëtë të ndihem. Zoti ju bekoftë.”** – u shpreh Luizi.
