Bujar Osmani dhe Izet Mexhiti në garë për Çairin

Zgjedhjet lokale në Komunën e Çairit pritet të sjellin një nga përballjet më të forta dhe simbolike në skenën politike shqiptare në Maqedoninë e Veriut. Dy emra me peshë – Bujar Osmani dhe Izet Mexhiti – janë tashmë zyrtarisht në garë për ta udhëhequr këtë komunë qendrore të Shkupit.

Kandidatura e Bujar Osmanit është zyrtarizuar ditë më parë nga BDI dhe Aleanca Kombëtare për Integrim, si pjesë e Frontit Europian. Osmani, një figurë me karrierë të gjatë dhe të spikatur, ka qenë ministër i Shëndetësisë, ministër i Punëve të Jashtme, si dhe zëvendëskryeministër për Integrim Europian.

Nga ana tjetër, VLEN zyrtarizoi të premten pasdite kandidaturën e Izet Mexhitit, një emër i lidhur ngushtë me historinë politike të Çairit, shkruan Flaka. Mexhiti ka qenë më parë kryetar i kësaj komune nën siglën e BDI-së, më pas deputet, dhe së fundmi zëvendëskryeministër në qeverinë teknike të udhëhequr nga VMRO-DPMNE dhe Hristijan Mickoski, si përfaqësues i VLEN-it.

Përballja mes dy ish-aleatëve, që dikur ndanin të njëjtën platformë politike brenda BDI-së, tashmë shënon një ndarje të qartë mes dy blloqeve kryesore shqiptare në vend. Çairi, si një nga komunat më të rëndësishme shqiptare në kryeqytet, pritet të jetë epiqendra e betejës politike në zgjedhjet e ardhshme. Flaka