Badenteri: Gjithmonë pas Mickoskit – Reagojnë vetëm pasi ai të deklarohet
Ministri aktual i Drejtësisë, Igor Filkov, në një prononcim për media tha që “ka ardhur koha për ta reviduar mekanizmin e Badenterit”.
Deklarata e tij nxiti reagime të shumta në kampin opozitar shqiptar. Bujar Osmani nga BDI shprehu shqetësimin për të ardhmen e të drejtave të shqiptarëve. Sipas Osmanit, Kjo konfirmon se plani për shpërbërjen e Marrëveshjes së Ohrit po zbatohet hap pas hapi.
Sakaq, ish ministri i drejtësisë Krenar Lloga reagoi duke thënë se pasi kontestuan çdo gjë që ka të bëjë me shqiptarët – dygjuhësinë, Balancuesin, regjistrimin e popullsisë, ofendimet e përditshme, zeroizimin e punësimeve, funksionarë minimalë ose pa asnjë peshë – shkuan aq larg, sa edhe vetë pushteti kriminal i Millosheviqit do t’ua kishte zili.
Nga ASH-ja e Arben Taravarit konstatuan që VLEN vazhdon të jetë mbështetës i çdo nisme antishqiptare të qeverisë jolegjitime. Me heshtjen dhe pranimin e veprimeve të tilla, VLEN po rrezikon interesat dhe të drejtat e shqiptarëve, duke e legjitimuar politikën diskriminuese të këtij pushteti.
U prononcua edhe kryeministri Hristijan Mickoski, i cili tha që Badenteri është pjesë e Marrëveshjes së Ohrit dhe të Kushtetutës.
“Marrëveshja e Ohrit është përmbushur plotësisht dhe është mbyllur dhe kjo është temë e kryer dhe e mbyllur. Ajo që përfaqësonte problem thelbësor dhe institucional dhe ajo ishte balancuesi, siç e dini, ne kemi bërë ligj, ligji për përfaqësim të drejtë, I cili krahas përkatësisë etnike do të ketë komponentë e cila do të vlerësoj sipas kualitetit, kompetencës e kështu me radhë”, ka deklaruar Mickoski.
Dhe vetëm pasi u prononcua Mickoski, erdhi reagimi nga zëvendësi i tij, Arben Fetai. Në një reagim të fundit në Facebook, zëvendëskryeministri Arben Fetai theksoi rëndësinë e mekanizmit të shumicës së dyfishtë, të njohur si Badinter, si gurthemeli i demokracisë konsensuale në Maqedoninë e Veriut.
Fetai theksoi se, megjithë zhurmën dhe spekulimet e krijuara gjatë fushatës parazgjedhore, Badinteri nuk mund të preket.
“Ky mekanizëm garanton barazinë, bashkëjetesën dhe paqen në vendin tonë, duke siguruar që vendimet kryesore të reflektojnë vullnetin e dy komuniteteve më të mëdha”, shkroi Fetai, duke shtuar se pa mbështetjen e deputetëve shqiptarë, çdo iniciativë për ndryshimin e Badinterit është juridikisht e pamundur, dhe se diskutimet në këtë drejtim janë vetëm diversion nga prioritetet reale të vendit. Flaka Media
