VLEN dhe mediat proqeveritare shqetësohen pas sondazhit në Çair: Bujar Osmani kryeson me 10 pikë përqindje
Pas publikimit të një sondazhi për zgjedhjet lokale në Çair, ku kandidati i BDI-së dhe Besëlidhjes Aleanca Kombëtare për Integrim, Bujar Osmani, kryeson me rreth 10 pikë përqindje mbi rivalin e tij, ish-kryetarin Izet Mexhiti, mediat e afërta me pushtetin VMRO-VLEN nisën një fushatë të ashpër kundër tij.
Sipas sondazhit, rezultatet tregojnë pakënaqësi serioze të qytetarëve me menaxhimin aktual të komunës dhe një rënie dramatike të mbështetjes për koalicionin qeveritar VLEN. Menjëherë pas publikimit të sondazhit, disa media kanë risjellë pretendime të vjetra ndaj Osmanit, lidhur me një çështje që institucionet e drejtësisë e kishin mbyllur përfundimisht në vitin 2024. Komisioni Shtetëror për Parandalimin e Korrupsionit dhe Prokuroria për Krim të Organizuar dhe Korrupsion kishin konstatuar se nuk kishte shkelje ligjore apo elemente korruptive në lidhje me aktivitetet e Osmanit.
“Pretendimi se Osmani ka bërë marrëveshje të fshehtë me një kompani shqiptare – marrëveshje kjo që ka qenë publike që në fazat e tenderimit – tingëllon jo vetëm absurd, por edhe ironik,” – thekson Gent Aliu, analist nga Shkupi.
Sipas tij, shqetësimi i VLEN-it dhe mediave proqeveritare tregon frikën nga humbja e ndikimit në komunat shqiptare, duke risjellë akuza të vjetra që nuk kanë asnjë bazë të re. Përveç kësaj, bizneset shqiptare vazhdojnë të përballen me margjinalizim nga qeveria aktuale, gjë që e bën situatën edhe më kontradiktore.
“Për qytetarët e Çairit, sondazhi konfirmon trendin e qartë: mbështetja për kandidatët që synojnë ndryshimin në drejtimin e komunës po rritet, ndërsa frika e VLEN-it dhe mediave afër qeverisë tregon se humbja e ndikimit është e prekshme”, thotë Aliu.
Tendenca që shihet kohëve të fundit nga media pro qeveritare janë edhe sulmet tendencioze në komunat e drejtuara nga opozita shqiptare. Rasti i fundit ishte raportimi nga Gostivari nga Alsat-Maqedoni, një lajm tendencioz dhe që nuk përkon me realitetin në Gostivar. Flaka Media
