Vjedhje e pazakontë në varreza – busti 320 mijë denarësh përfundon në automjet

Prokuroria Themelore Publike në Shkup ka nisur procedurë kundër katër personave të dyshuar për vjedhjen e një busti prej bronzi në Varrezat e Butelit, raporton INA.

Prokurori publik ka paraqitur kërkesë në Gjykatën Penale Themelore Shkup për caktimin e masës së paraburgimit ndaj të dyshuarve.

Sipas njoftimit zyrtar, ngjarja ka ndodhur më 17 shtator, kur të dyshuarit kanë hyrë në varrezat e qytetit në Butel dhe janë drejtuar te aleja e qytetarëve të merituar. Aty, duke përdorur forcë fizike, ata kanë shkulur bustin prej bronzi me dy figura njerëzore, që ndodhej mbi varrin e shkrimtarit Stale Popov dhe Branka Popovska.

Gjatë veprimit, ata jo vetëm që kanë dëmtuar bustin, por edhe platformën e varrit, duke fyer kështu vendin e shenjtë. Pasi e hodhën bustin në tokë, e tërhoqën deri te gardhi i varrezave, ku kishin bërë një hapësirë, dhe e kaluan përmes saj për ta ngarkuar në automjet me qëllim përvetësimi.

Sipas vlerësimeve, busti i përket trashëgimtares së familjes Popov dhe ka vlerë rreth 320.000 denarë.(INA)