Refuzohet kandidatura, VLEN nuk do të ketë kandidat për kryetar në Butel
Koalicioni qeveritar VLEN nuk do të ketë kandidat për kryetar të Butelit, pasi Komisioni Shtetëror i Zgjedhjeve dhe më pas edhe Gjykata Administrative e kanë refuzuar kandidaturën.
Lajmin e ka bërë të ditur vetë Behar Emini nëpërmjet një postimi në profilin e tij në “Facebook”.
Ai tha se megjithëse nuk do të kenë kandidat, bartësi i listës do të realizojë fushatë dhe ai do t’i qëndrojë në mbështetje.
“KSHZ-ja refuzoi t’i pranojë dokumentet e dorëzuara me pak vonesë, ndërsa Gjykata Administrative – si çerdhe e gjykatësve të vendosur nga pushteti i kaluar – vetëm e konfirmoi qëndrimin e KSHZ-së.
Sidoqoftë, përkundër shijes së keqe që na e lënë institucionet e a.q. të drejtësisë, ne do të marrim pjesë në këto zgjedhje, duke u përfaqësuar me bartësin e listës së këshilltarëve të VLEN-it për Komunën e Butelit, Behar Rexhepi, i cili përveçse e gëzon mbështetjen time të plotë, jam i bindur se do të jetë edhe zëri më i denjë i të gjithë qytetarëve të Komunës së Butelit në këshillin e ardhshëm komunal!”, tha mes tjerash Emini.
