Diaspora veleshtare në Zvicër përkrahë kandidatin e pavarur për Strugën Mendi Qyra

Diaspora nga Veleshta që jeton në Zvicër ka bërë të ditur se përkrah kandidatin e pavarur për kryetar të Komunës së Strugës, Mendi Qyra.

Në një deklaratë publike, përfaqësues të diasporës theksojnë se ndihen të zhgënjyer nga premtimet e parealizuara të partive politike ndër vite, veçanërisht lidhur me çështjet infrastrukturore si uji dhe kanalizimi. Sipas tyre, qytetarët janë përballur vazhdimisht me fushata zgjedhore që ofrojnë të njëjtat zotime, të cilat nuk janë përmbushur.

Në deklaratë thuhet se kandidatura e Mendi Qyrës shihet si një alternativë ndaj “politikës së vjetër”. Ai përshkruhet si kandidat i pavarur, i cili vjen nga komuniteti lokal dhe nuk mbështetet nga parti politike.

Diaspora veleshtare në Zvicër apelon për mbështetje ndaj tij, duke theksuar nevojën për ndryshim dhe përfaqësim të ndershëm në drejtimin e Komunës së Strugës.