Tragjedi në Malishevë: Zjarri në banesë i merr jetën një burri dhe dy fëmijëve

Një ngjarje e rëndë ka ndodhur në Malishevë, ku si pasojë e një zjarri në një banesë kanë humbur jetën tre persona.

Burime bëjnë të ditur se viktimat janë një burrë rreth 35-vjeçar dhe dy fëmijë të moshës 9 dhe 12 vjeç. Zjarri dyshohet se ka shpërthyer rreth orës 12:55 në lagjen “Mirdita”.

Pas njoftimit për rastin, në vendin e ngjarjes kanë ndërhyrë menjëherë policia, zjarrfikësit dhe ekipet emergjente. Tre personat e gjetur në banesë janë transportuar drejt Qendrës së Mjekësisë Familjare në Malishevë, ku mjekët kanë konstatuar vdekjen e tyre.

Autoritetet kanë arritur ta vënë nën kontroll zjarrin, ndërsa nuk raportohet për persona të tjerë të lënduar. Për rastin është njoftuar edhe prokurori i shtetit dhe kanë nisur hetimet për të zbardhur shkaqet dhe rrethanat e kësaj tragjedie.