MSH: Në spitalin e Koçanit do të kryhen ekzaminime mamografike për pacientet nga Shtipi dhe rajoni
Ministria e Shëndetësisë informon opinionin se, për shkak të defektit të aparatit të mamografisë në Spitalin Klinik të Shtipit, është vendosur një organizim i koordinuar me qëllim sigurimin e pandërprerë të ekzaminimeve mamografike për gratë nga rajoni lindor.
Në këtë drejtim, drejtorët e Spitalit Klinik të Shtipit dhe Spitalit të Përgjithshëm të Koçanit ranë dakord për një zgjidhje të përbashkët që mundëson vazhdimësinë e shërbimit.
Mamografitë do të kryhen në Spitalin e Përgjithshëm në Koçan, ndërsa incizimet do të lexohen dhe interpretohen nga ekipi profesional në Spitalin Klinik të Shtipit.
“Sipas indikacioneve mjekësore, pacientet tek të cilat nevojitet ekzaminim shtesë me eko të gjirit do të referohen dhe do të kontrollohen në Shtip. Po bëjmë përpjekje për sigurimin e një mamografi të ri për Shtipin, pas vlerësimeve përkatëse gjatë periudhës së kaluar për pamundësinë e riparimit të pajisjes ekzistuese”, thotë dr. Vladko Zahariev, drejtor i SK Shtip.
Për pacientet nga qytetet e tjera të rajonit lindor është paraparë një ditë e veçantë për kontrolle, me qëllim organizim më të mirë dhe qasje më të lehtë.
Drejtori i Spitalit Klinik të Shtipit informon se me këtë organizim mundësohet që rreth 100 paciente në muaj të marrin shërbime mamografike.
Drejtoresha e Spitalit të Përgjithshëm të Koçanit thekson se do të vendoset një ndërrim i dytë, me qëllim që t’u dilet në ndihmë grave nga rajoni lindor.
“Kemi hapur një numër të shtuar terminesh, me qëllim që t’u përgjigjemi nevojave dhe të sigurojmë përfshirje sa më të madhe të grave nga i gjithë rajoni lindor me këtë shërbim të rëndësishëm shëndetësor”, thotë dr. Katerina Mirçovska.
Ministria e Shëndetësisë mbetet e përkushtuar në sigurimin e kujdesit shëndetësor në kohë dhe të qasshëm për të gjithë qytetarët.
“Institucionalisht jemi mobilizuar dhe në koordinim me të dy institucionet shëndetësore kemi mundësuar që ky shërbim, si zgjidhje e përkohshme, të jetë i qasshëm për pacientet nga ky rajon. Kjo është mënyra se si sistemi duhet të funksionojë kur përballet me sfida”, thekson ministri i Shëndetësisë, Azir Aliu.
