LAMM: Komunikacion pa pengesa në rrugët shtetërore, apel për kujdes në segmentet malore

Komunikacioni në rrugët shtetërore po zhvillohet pa vështirësi dhe në kushte të rregullta, me rrugë kryesisht të thata, njofton Lidhja Auto-Moto e Maqedonisë (LAMM).

Sipas informacioneve të fundit, intensiteti i trafikut jashtë zonave urbane mbetet mesatar, pa ngarkesa të theksuara që do të ndikonin në qarkullim. Në vendkalimet kufitare, nga ana e Maqedonisë së Veriut, nuk raportohen pritje më të gjata për hyrje apo dalje nga shteti.

LAMM u bën thirrje drejtuesve të automjeteve që të përshtatin shpejtësinë me kushtet e rrugës, të respektojnë sinjalistikën rrugore dhe të ngasin me kujdes të shtuar, veçanërisht në zonat malore dhe nëpër lugina e gryka, ku ekziston rreziku i mundshëm i rrëshqitjeve të dheut.

Kujdes i veçantë rekomandohet në segmentet Katllanovë–Veles, Mavrovë–Dibër–Strugë, Vinicë–Berovë dhe Koçan–Delçevë, ku terreni dhe konfigurimi i rrugës kërkojnë vigjilencë më të madhe gjatë ngasjes.