VMRO-DPMNE: Valbon Limani po shmang përgjegjësinë për rastin me ujin në Gostivar

VMRO-DPMNE ka akuzuar kryetarin e Komunës së Gostivarit, Valbon Limani, se po shmang përgjegjësinë lidhur me rastin e ujit në këtë komunë, duke vlerësuar se për të prioritet është ruajtja e pozitës dhe jo besimi i qytetarëve.

“Valbon Limani, kandidati i Filipçes, Ahmetit dhe Taravarit, ka treguar se gjëja më e rëndësishme për të është të ruajë pozicionin e tij, jo besimin e qytetarëve. Në vend që të dalë para publikut me ndjenjë përgjegjësie dhe të pranojë se si kryetar bashkie mban përgjegjësinë më të madhe për ngjarjet në Komunën e Gostivarit, ai zgjodhi të distancohet nga skandali i ujit dhe të thotë se nuk ndjen asnjë përgjegjësi morale”, thuhet në reagimin e VMRO-DPMNE-së.

Nga kjo parti theksojnë se në një situatë kur i gjithë qyteti përballet me një problem serioz, qytetarët presin përgjegjësi dhe jo arsyetime.

“Nëse kryetari i komunës nuk është përgjegjës për punën e njerëzve që ai vetë i ka emëruar për të menaxhuar ndërmarrjet publike, atëherë kush është?”, pyesin nga VMRO-DPMNE.

Partia në pushtet kritikon gjithashtu heshtjen e LSDM-së, BDI-së dhe Arben Taravarit, duke pretenduar se këto subjekte nuk kanë kërkuar përgjegjësi nga kandidati i tyre.

“Shqetësuese është edhe heshtja e LSDM-së, BDI-së dhe Taravarit. Në vend që të kërkojnë përgjegjësi nga kandidati i tyre, ata zgjodhën të heshtin. Natyrisht, kur bëhet fjalë për zyrtarët e tyre, standardet ndryshojnë dhe parimet zhduken”, thuhet në reagim.

Sipas VMRO-DPMNE-së, askush nuk duhet të jetë i mbrojtur nga përgjegjësia politike apo institucionale. Partia u bën thirrje institucioneve kompetente që ta zbardhin plotësisht rastin, pa selektivitet dhe pa llogaritje politike.