INNOX Innovation Center dhe Halkbank ShA Shkup diskutojnë për forcimin e ekosistemit të inovacionit dhe sipërmarrjes në rajon

CEO i INNOX Innovation Center, Abil Baush, zhvilloi një takim pune me Dr. Fatih Şahbaz, Drejtor i Përgjithshëm i Halkbank ShA Shkup, me fokus në avancimin e bashkëpunimit për zhvillimin e ekosistemit të inovacionit dhe sipërmarrjes në Maqedoninë e Veriut dhe në Ballkanin Perëndimor.

Gjatë takimit u diskutua rëndësia e partneritetit ndërmjet sektorit financiar dhe organizatave të inovacionit për krijimin e mundësive të reja për startup-et, sipërmarrësit dhe të rinjtë. Gjithashtu, u theksua roli i iniciativave që nxisin zhvillimin ekonomik përmes inovacionit, transformimit digjital dhe bashkëpunimit rajonal.

Në këtë takim, INNOX prezantoi progresin dhe rezultatet e Bridge2Balkan, një iniciativë rajonale që lidh startup-et, mentorët, investitorët dhe partnerët strategjikë nga Ballkani dhe Turqia, me qëllim ndërtimin e një ekosistemi më të fortë dhe më të qëndrueshëm të inovacionit.

Abil Baush shprehu mirënjohjen për mbështetjen dhe gatishmërinë e Halkbank ShA Shkup për të kontribuar në zhvillimin e sipërmarrjes dhe inovacionit, duke theksuar se partneritete të tilla janë thelbësore për krijimin e mundësive të reja për gjeneratën e ardhshme të inovatorëve.

INNOX Innovation Center mbetet i përkushtuar për të ndërtuar ura bashkëpunimi ndërmjet institucioneve financiare, sektorit privat, universiteteve dhe organizatave ndërkombëtare, me synimin për ta pozicionuar Maqedoninë e Veriut si një qendër rajonale të inovacionit dhe sipërmarrjes.