“Nuk dhanë rezultate”, MPB shpërndan njësinë kundër drogës në Kumanovë

Vetëm 11 javë pas formimit të ekipit të posaçëm për luftën kundër drogës, Ministria e Punëve të Brendshme ka vlerësuar se rezultatet e njësisë rajonale në SPB Kumanovë kanë qenë të pamjaftueshme dhe ka vendosur ta shpërndajë atë.

Vendimi është marrë me propozim të drejtorit të Byrosë për Siguri Publike, Aleksandar Janev, dhe me miratimin e ministrit të Punëve të Brendshme, Pançe Toshkovski.

Njësia ishte përgjegjëse për luftën kundër tregtisë dhe shpërndarjes së drogës dhe substancave psikotrope në Kumanovë, Kratovë dhe Kriva Pallankë.

Me vendimin e ri, të gjithë anëtarët e njësisë janë shkarkuar nga pozitat e deritanishme dhe janë sistemuar në vende të tjera pune, ndërsa në vend të tyre janë caktuar zyrtarë të rinj policorë.

Janev ka deklaruar se lufta kundër kriminalitetit kërkon aksione konkrete, sekuestrimin e drogës dhe identifikimin e autorëve.

Ai paralajmëroi gjithashtu masa shtesë në rastet kur konstatohet mungesë angazhimi apo mungesë rezultatesh në punën e zyrtarëve.