A mund të jetë Mickoski udhëheqës edhe i shqiptarëve? Përplasjet me BDI-në thellohen
Kryeministri dhe lideri i VMRO-DPMNE-së, Hristijan Mickoski, nga një aktivitet partiak ka përjashtuar çdo mundësi që Bashkimi Demokratik për Integrim (BDI) të bëhet pjesë e Qeverisë pas zgjedhjeve të tetorit. Ai u shpreh se BDI-ja bashkë me LSDM-në do të mbeten në opozitë, duke i akuzuar si “ortakë në krim dhe goditje ndaj Maqedonisë”.
“Një njeri më thotë: po e përgatisni BDI-në t’ju bëhet partner në Qeveri. Përgjigja ime e drejtpërdrejtë është se BDI edhe për një kohë të gjatë do të jetë opozitë, sepse deri tani nuk ka mësuar asnjë leksion. Ata aty u përkasin, me ortakun e tyre koalicionues në krimin dhe goditjet kundër Maqedonisë – LSDM-në. Do të jem shumë i qartë dhe shumë preciz: këto zgjedhje nuk do të jenë dera e Bashkimit Demokratik për Integrim për në Qeveri,” – deklaroi Mickoski.
Nga BDI reaguan ashpër, duke i cilësuar akuzat e kryeministrit si shpifje dhe si përpjekje për të fshehur krizën e legjitimitetit të një qeverie që e quajnë “monoetnike”.
“Deklaratat e sotme të kryeministrit Mickoski nuk janë vetëm shpifje të pastra dhe tentativë e dështuar për të fshehur krizën e legjitimitetit të qeverisë së tij monoetnike, por edhe të rrezikshme pasi përbëjnë nxitje për përplasje etnike. BDI gjithmonë ka qenë garanci për zgjedhje të lira dhe demokratike dhe nuk ka asnjë arsye të angazhohet në plane të fshehta ose kaos, siç pretendon Mickoski,” – thuhet në reagimin e partisë.
BDI thekson se kryeministri duhet të japë llogari për politikat diskriminuese ndaj shqiptarëve dhe shkeljet e Kushtetutës:
“Në vend që të shpikë armiq imagjinarë, kryeministri duhet të shpjegojë pse qeveria e tij po shkel Kushtetutën, pse po diskriminon shqiptarët, pse e uli në kundërshtim me Kushtetutën dhe ligjin numrin e këshilltarëve, pse po e instrumentalizon KSHZ, Gjykatën Kushtetuese dhe institucionet e tjera në shërbim të planeve të tij partiake e monoetnike dhe pse me çdo vendim e kthen vendin mbrapa në kohën e para vitit 2001.”
Partia kujton gjithashtu se bashkëpunimi mes VMRO-së dhe LSDM-së është dëshmuar në Kuvend:
“Se kush është duke bashkëpunuar me LSDM, qytetarët e panë edhe dje, kur VMRO dhe LSDM bashkuan votat për të diskriminuar përfaqësimin e diasporës në komunat tona.”
Sipas BDI-së, zgjedhjet e tetorit do të jenë “referendum i qytetarëve kundër politikës së frikës, manipulimit dhe përçarjes”. Flaka Media
