Adem Salihaj pyet opozitën: Pse nuk e zgjedh nënkryetarin serb kur i ka votat, por e mban Kuvendin të bllokuar?
Ish-deputeti i LDK-së, Adem Salihaj, ka reaguar lidhur me ngërçin e krijuar për zgjedhjen e nënkryetarit të Kuvendit nga komuniteti serb. Ai ka thënë se Vetëvendosje po insiston me çdo kusht që ky post t’i takojë Nenad Rashiqit, por nuk i ka votat e nevojshme, ndërsa opozita nuk po e voton atë me arsyetimin se një vendim i tillë është kundërkushtetues.
Salihaj thekson se opozita vet e konsideron kushtetuese zgjedhjen e nënkryetarit nga radhët e Listës Serbe, pasi kjo parti ka shumicën e deputetëve serbë në Kuvend. “Nëse është kushtetuese dhe e drejtë zgjedhja e nënkryetarit serb nga radhët e Listës Serbe, pse opozita nuk e voton, sepse i ka votat e mjaftueshme për ta bërë këtë?”, shkruan ai.
Sipas tij, opozita aktualisht i ka 62 ose 63 vota, të mjaftueshme për ta zhbllokuar Kuvendin dhe për të ecur përpara, por zgjedhja po zvarritet qëllimisht.
Shkrimi i plotë:
Vetëvendosje insiston me çdo kusht që nënkryetar i Kuvendit të zgjedhet Nenad Rashiqi, por nuk i ka votat. Partitë e opozitës nuk po e votojnë Nenad Rashiqin, sepse kjo, sipas mendimit të tyre, është kundërkushtetuese. Vetëvendosja nuk e voton kandidatin e Listës serbe, sepse këtë parti e konsideron organizatë kriminale. Opozita konsideron se është kushtetuese të zgjedhet nënkryetari nga radhët e Listës serbe, sepse kjo parti e ka shumicën e deputetëve serbë në Kuvend. Pyetja është: nëse është kushtetuese dhe e drejtë zgjedhja e nënkryetarit serb nga radhët e Listës serbe, pse opozita nuk e voton, sepse i ka votat e mjaftueshme për ta bërë këtë? PDK 24 LDK 20 AAK+NISMA 8 LISTA SERBE 9 Pakicat joserbe 1 ose 2 Pra, janë 62 ose 63 vota, që janë plotësisht të mjaftueshme për këtë votim. Në këtë mënyrë, opozita do ta zhbllokonte Kuvendin dhe do të ecej tutje. Kështu si po vazhdon, nuk do të kryhet kurrë ky proces. Tash mund të bëhet një raund i ri në Gjykatën kushtetuese dhe Kuvendi sërish do të kthehet në të njëjtën pikë që është tash, pa gjasa për të ecur përpara.
