Ademi dhe Bexheti: Mickoski nuk e cakton përfaqësimin e shqiptarëve
Zyrtarët e BDI-së, Arbër Ademi dhe Blerim Bexheti, kanë reaguar ndaj qasjes së kryeministrit Hristijan Mickoski, duke theksuar se “tetori do të sjellë përgjigjen e parë”.
“Në tetor Mickoski do t’i mësojë dy të vërteta të hidhura. E para: nuk është ai që cakton kush i përfaqëson shqiptarët as me ‘pushtetin’ e tij, e as me ndihmën e vazalëve që i shërbejnë. E dyta: Marrëveshja e Ohrit nuk është letër që mund të griset me një firmë të tij. Ajo është e vulosur me gjakun e shqiptarëve dhe e blinduar me nënshkrimet e SHBA-së dhe BE-së. Për Mickoskin, kjo marrëveshje do të mbetet gjithmonë një ‘kafshatë që nuk kapërdihet’. Tetori është afër dhe ai do ta kuptojë këtë më shumë se kurrë,” kanë theksuar Ademi e Bexheti.
Sipas tyre, Mickoski ka zgjedhur partnerin qeverisës ende pa përfunduar zgjedhjet parlamentare dhe pa u shprehur shqiptarët.
“Kryeministri Mickoski e zgjodhi vetë partnerin qeverisës ende pa përfunduar zgjedhjet parlamentare dhe ende pa e thënë qytetarët fjalën e tyre, posaçërisht shqiptarët! Sot partnerin VLEN e qorton herë pas here publikisht, vetëm për t’i disiplinuar sa herë që harrojnë kush është ai që ‘kollet’ në qeveri,” shtuan ata.
Duke ironizuar me prioritetet e VLEN-it, ata nënvizuan:
“Atij i ka dalë mirë për vete, ndërsa këta të shkretët vrapojnë pas bekatonkave e kanalizimeve, duke hedhur gurë e dru për të arsyetuar dhe relativizuar çdo politikë e vendim që i dëmton pikërisht ata të cilët pretendojnë se i përfaqësojnë.”
Në fund, Ademi dhe Bexheti theksuan se tendenca e kësaj qeverie është e qartë:
“Asimilimi i përfaqësimit politik të shqiptarëve dhe revizionizmi i statusit politik e juridik të shqiptarëve që buron nga Marrëveshja e Ohrit. Por pa merak, kryeministër, në tetor do ta keni përgjigjen e parë. Pastaj shohim e bëjmë…”, përfunduan zyrtarët e BDI-së. Flaka Media
