Adoleshenti i Barcelonës rrezikon operimin dhe të mbyll sezonin

Çerekfinalja e Kupës së Mbretit ndaj Atletik Bilbaos rezultoi të ishte e mallkuar për lojtarin e Barcelonës, Alehandro Balde. Anësori i krahut të majtë u detyrua të braktiste fushën e lojës në minutën e 23 pas një tërheqje mukulore.

Që bëhej fjalë për një dëmtim serioz u kuptua për vetë faktin se 20-vjeçari nuk mundi t’i mbante lotët. Balde iu nënshtruar analizave më të detajuara të cilat zbuluan se koha e rikuperimit do të jetë jo më pak se katër muaj. Një opsion është edhe ndërhyrja kirurgjikale, por kjo alternativë do t’i jepte fund shanseve për rikthimin në fushë brenda këtij sezoni, ndërsa edhe pjesëmarrja në Europian do të ishte në dyshim serioz.

Për momentin, lojtari dhe mjekët nuk kanë marrë një vendim final, me Balde që i duhet të përcaktojë mënyrën e rikuperimit. Sakaq, me dëmtimin e Balde, shtohen edhe më shumë “dhimbjet e kokës” për trajnerin Hernandez i cili nuk ka në dispozicion as Markos Alonso apo Zhoao Kanselo.

Tekniku blaugranave në këtë sezon është detyruar të mbështetet te La Masia, duke aktivizuar një “tufë” me të rinj nga shkolla blaugranase. Edhe në këtë rast, në pritje të rikuperimit të Alonso apo Kanselos, Balde do të zëvendësohet nga 17-vjeçari Hektor Fort.