Aleanca për Shqiptarët: Shpifjet e VMRO-DPMNE-së nuk pijnë më ujë
Aleanca për Shqiptarët ka reaguar ndaj deklaratave të VMRO-DPMNE-së dhe liderit të saj Hristijan Mickoski, duke i cilësuar si “shpifje të radhës” dhe përpjekje të dëshpëruara për të devijuar vëmendjen e opinionit nga dështimet e qeverisë aktuale.
“Kur VMRO-DPMNE dhe Hristijan Mickoski hedhin vrer, bëhet e qartë një e vërtetë e pamohueshme: janë kampionë të shpifjes dhe asgjë nga ajo që thonë nuk qëndron. Shpifjet e radhës që na servir ‘Pallati i Bardhë’ janë vetëm përpjekje të dëshpëruara për të devijuar vëmendjen e opinionit nga dështimet e njëpasnjëshme”, thuhet në reagimin e ASH-së.
Sipas tyre, Mickoski deri dje ka qenë në bashkëqeverisje lokale dhe qendrore me Aleancën për Shqiptarët, por nuk ka pasur asnjë vërejtje, ndërsa sot shpif vetëm pse “iu prishën planet ogurzeza ndaj shqiptarëve”.
Aleanca kujton periudhën e qeverisjes së Gruevskit, kur “korrupsioni masiv” ishte pjesë e përditshme e VMRO-së. “Bashkë me eksperimentin e tij VLEN akuzojnë për një parking që s’u bë kurrë dhe nuk nxorën asnjë fakt keqpërdorimi, ndërsa sot e kësaj dite gërmadhat e tyre të korrupsionit qëndrojnë në Vardar, në qendër të Shkupit, dhe nuk i lan dot as uji i lumit e as ai liqenit e as i ndonjë oqeani”, theksojnë nga ASH.
Partia e Arben Taravarit e konsideron veten të pavarur dhe të pakapur nga askush: “Vendimet tona janë autonome dhe të pandikuara nga faktorë të jashtëm. Për këtë arsye vendosëm të largohemi pa asnjë pishman nga kjo qeveri antishqiptare e antieuropiane, duke treguar se ASH nuk shantazhohet, nuk blihet dhe nuk shitet.”
Në reagim përmendet edhe qëndrimi i Mickoskit për integrimin evropian. “Vetë Mickoski ka thënë: ‘Nuk bëhet asnjëherë anëtarësimi i Maqedonisë së Veriut në Bashkimin Evropian’. Nëse ka menduar se këto fjalë të dhëna në rreth të mbyllur do të shërbenin si ushqim nacionalist për anëtarësinë, ka gabuar rëndë”, shprehen nga ASH.
Aleanca akuzon Mickoskin se me veprimet e tij po saboton rrugën evropiane dhe po rrezikon të ardhmen e vendit. “Qëndrimet antishqiptare dhe antievropiane të Mickoskit nuk janë më sekret publik. Deklarata e tij e fundit se ‘Ndryshimet Kushtetuese nuk do të ndodhin as para e as pas zgjedhjeve lokale’ është dëshmi e qartë e sabotimit të rrugës evropiane, ashtu si veprimet e tij të përditshme për të cenuar të drejtat e shqiptarëve dhe për të zhbërë Marrëveshjen e Ohrit.”
Në fund, ASH i bën thirrje liderit të VMRO-së që të shkëputet nga aleancat e jashtme: “Mickoski bën mirë të ndërpresë lidhjet me Moskën, Budapestin dhe Beogradin dhe të ndalojë së qeni promotor i ‘Botës Serbe’. Shqiptarët nuk do të lejojnë kurrë që Maqedonia e Veriut të shndërrohet në armike të Bashkimit Evropian, NATO-s dhe Shteteve të Bashkuara të Amerikës.” Flaka Media
