Ali Ahmeti: Me logon e re të AKI-së hyjmë të bashkuar në zgjedhjet e tetorit
Kryetari i Bashkimit Demokratik për Integrim, Ali Ahmeti, duke prezantuar logon e re të Aleancës Kombëtare për Integrim (AKI), ka theksuar se partia hyn në zgjedhjet e tetorit e bashkuar dhe me vizion të qartë europian.
“Jetojmë në kohë jo të lehta dhe ne shqiptarët respektohemi gjithnjë e më pak nga qeveria aktuale, e cila nuk ka legjitimitet etnik shqiptar,” deklaroi Ahmeti.
Ai tha se, pavarësisht sfidave, BDI nuk e harron destinacionin europian. “Sot nevojitet bashkim, më së pari mes gjithë shqiptarëve, që duhet të bëhen bashkë për njëri-tjetrin, por edhe mes të gjithë atyre që nuk dorëzohen lehtë dhe që besojnë se në vendin tonë mund të ndërtojmë një të ardhme më të mirë për fëmijët tanë.”
Ahmeti shtoi se e ardhmja e shqiptarëve është integrimi europian. “E teksa bashkohemi, të mos harrojmë mësimet e së kaluarës së hidhur dhe ta mbajmë gjithmonë në mendje se e ardhmja jonë është integrimi në familjen e madhe europiane.”
Duke e përmbyllur fjalën e tij, kreu i BDI-së nënvizoi: “Kjo është besëlidhja e fitores, e besimit dhe e integrimit europian. Duart e bashkuara janë mesazhi ynë: vetëm së bashku ndërtojmë të ardhmen që meritojmë.”Flala Media
