ASH: Dështoi tentimi i qeverisë për ndryshimin e Kodit Zgjedhor – VLEN u servilos ndaj VMRO-DPMNE-së

Aleanca për Shqiptarët ka reaguar pas seancës së jashtëzakonshme të Kuvendit, të shtunën, ku në rend dite ishin ndryshimet e Kodit Zgjedhor. Ky ligj kërkonte parimin e votimit me Badinter, por sipas ASH-së, qeveria tentoi ta kalojë pa konsultim dhe pa transparencë me opozitën shqiptare.

“Deputetët e opozitës shqiptare nuk u konsultuan për asgjë, ndonëse kjo ka qenë gjithmonë praktikë e zakonshme kur bëhet fjalë për ligje që prekin Kodin Zgjedhor”, thekson ASH.

Sipas opozitës shqiptare, edhe pse e anashkaluar, ajo tregoi gatishmëri për kompromis:

“Ne ofruam mbështetje për ligjin, me kusht që qeveria të shfuqizojë vendimin për uljen e numrit të këshilltarëve komunalë – vendim i shpallur antikushtetues nga Gjykata Kushtetuese. Por nuk pati asnjë gatishmëri nga shumica parlamentare, madje as nga VLEN-i”, thuhet në reagimin e ASH-së.

Aleanca akuzon se qeveria dhe VMRO-DPMNE kanë agjendë diskriminuese:

“Maskat ranë. U bë e qartë se Mickoski dhe qeveria e tij kanë një agjendë të qartë diskriminuese ndaj qytetarëve me të drejtë vote”, deklaron ASH.

Një tjetër paradoks, sipas opozitës, lidhet me mërgimtarët shqiptarë:

“Është paradoks i madh që mërgimtarët shqiptarë kanë të drejtë vote, por nuk kanë asnjë ndikim në përcaktimin e numrit të këshilltarëve. Ndërkohë, pjesa shqiptare brenda qeverisë bën vetëm sehir”, thekson ASH.

Partia opozitare kritikon ashpër edhe ministrat dhe deputetët shqiptarë të pushtetit:

“Asnjë ministër shqiptar dhe asnjë deputet shqiptar nga pushteti nuk e hapi gojën për këtë çështje. Ky është paradoksi i VLEN-it”, thuhet në reagim.

Në fund, ASH rithekson se parimi i Badinterit mbrojti barazinë politike dhe interesat e qytetarëve:

“Tentativa për ta ndryshuar Kodin Zgjedhor pa konsultim dhe transparencë dështoi. Aleanca për Shqiptarët do të mbrojë gjithmonë interesin politik dhe të drejtën e barabartë të qytetarëve përballë çdo tentative për përjashtim, manipulim dhe diskriminim.”