Atletiko Madridi tallet keq fare me ankesat e Florentino Perezit për arbitrimet

Të shtunën në mbrëmje do të luhet Real Madrid- Atletiko Madrid, një derbi që këtë herë premton shumë tension. Gjithçka nisi me një letër zyrtare të dërguar nga Real Madrid në La Liga, ku kampionati spanjoll u cilësua si “i manipuluar dhe i korruptuar”.

Arsyeja?

Një faull i rëndë i Karlos Romero (Espanyol) ndaj Kilian Mbapes, i cili nuk u ndëshkua me karton të kuq. Atletiko Madridi nuk ka vonuar të përgjigjet dhe ka bërë tri postime thumbuese në rrjetin social “X”.

Në të parin, klubi i drejtohet RAE (institucionit spanjoll për gjuhën) dhe kërkon të shpjegojë dallimet mes fjalëve: presion, frikësim, influencim, imponim.

Në të dytin poston me ironi: “Ops, ndoshta duhet ta kishim pyetur në mesazh privat”.

Mesazhi i tretë ishte më i drejtpërdrejtë; një ilustrim në stilin e udhëzimeve të IKEA, ku në figurën e fundit shkruhej: “Përdor televizionin tënd zyrtar, edhe një herë tjetër, për të ushtruar presion mbi arbitrat”.

Ky ishte një sulm i hapur ndaj Real Madridit, që sipas Atletico Madridit, shpesh përdor media të afërta për të ndikuar tek vendimet arbitrale.