Avionët rus shkelin hapësirën ajrore të NATO-s, fluturime brenda Estonisë dhe Polonisë
Estonia ka kërkuar konsultime me anëtarët e tjerë të NATO-s pasi avionët luftarakë rusë shkelën hapësirën e saj ajrore të premten.
Ministria e Jashtme e Estonisë e dënoi ndërhyrjen si “të paturpshme”, duke shtuar se 3 avionë luftarakë rusë MiG-31 hynë në hapësirën ajrore “pa leje dhe qëndruan për një total prej 12 minutash” mbi Gjirin e Finlandës.
Italia, Finlanda dhe Suedia ngritën në ajër avionë luftarakë në kuadër të misionit të NATO-s për të forcuar krahun e saj lindor. Më vonë, Rusia mohoi shkeljen e hapësirës ajrore të Estonisë.
Në incidentin e dytë dy aeroplanë luftarakë rusë nga Forcat e Armatosura të Rusisë kryen një fluturim të ulët mbi platformën e naftës polake Petrobaltic në Detin Baltik, raportoi Polskie Radio 24.
“Shërbimet përgjegjëse për sigurinë e Polonisë monitorojnë vazhdimisht situatën brenda infrastrukturës kritike detare, duke përfshirë zonat jashtë ujërave territoriale të Republikës së Polonisë”, tha Shërbimi Shtetëror Kufitar në një deklaratë.
“Aeroplanët luftarakë fluturonin në një lartësi prej afërsisht 150 metrash”, shkroi në rrjetin social X Karolina Galecka, zëdhënëse e Ministrisë së Brendshme dhe Administratës.
Tensionet janë përshkallëzuar midis NATO-s dhe Rusisë javën e fundit, pasi Polonia dhe Rumania, të dyja anëtare të aleancës ushtarake, thanë se dronët rusë shkelën hapësirën e tyre ajrore. Në përgjigje, NATO u zotua të zhvendosë asetet ushtarake, përfshirë avionët luftarakë, në drejtim të lindjes për të forcuar mbrojtjen. (INA)
