Babai i talentit të madh pranoi mashtrimin, certifikata e lindjes është false
Jusoufa Moukoko është sërish në qendër të vëmendjes së publikut vendas, pasi babai i tij i supozuar doli përpara dhe ekspozoi mashtrimin e tij. Josef Moukoko, i cili është 73 vjeç dhe njihet si babai i lojtarit të Borussia Dortmund, i cili këtë sezon luan si i huazuar në Nica ka thënë se ai nuk është babai biologjik i Jousoufa-s dhe se ka falsifikuar moshën e tij!
Siç tregoi ai në deklaratën e tij, ai rinoi djalin e tij të adoptuar me katër vjet dhe kështu mashtroi botën.
“Duke ditur përgjegjësinë penale të deklaratave të rreme, deklaroj nën betim: Jousoufa Moukoko nuk është djali biologjik i imi dhe gruas sime Marie Moukoko. Gjithashtu, ai nuk ka lindur më 20 nëntor 2004 në Jaounde. Kam marrë një certifikatë të rreme lindjeje për atë në Jaounde. Më pas shkova në ambasadë, e mora pasaportën e tij dhe e çova në Gjermani, kështu që në letra thuhet se ai ka lindur më 20 nëntor 2004”, raportoi gazeta Bild deklaratën e “babait” të Moukoko.
Josef zbuloi gjithçka në një film dokumentar të prodhuar nga “ProSieben”, dhe kështu shumë nga rekordet e Joussouf mund të bien në ujë, si ai për debutuesin më të ri dhe golashënuesin më të mirë në historinë e Bundesligës, debutuesin më të ri në Ligën e Kampionëve dhe lojtari më i ri i kombëtares gjermane që luajti në një Kupë të Botës. Gazeta “Bild” shton se Josef ka punuar në Dortmund si video analist dhe skaut, fillimisht për 10,000 euro në muaj, më vonë dyfishin e kësaj shume.
“Gruaja ime ishte e punësuar në një agjenci që punonte për sponsorin e Borussias, Evonik, dhe unë u punësova në Borussia. Kështu merrnim para çdo muaj. Ne nuk punonim, merrnim para në këtë mënyrë”, pranoi Joseph.
E përditshmja gjermane hetoi origjinën e lojtarit të ri në Kamerun vitin e kaluar dhe nuk mundi të gjente certifikatën e tij të lindjes në zyrën e gjendjes civile. Në fund të fundit, Dortmundi njoftoi dje.
“Në rastin e Jousoufa Moukoko, prindërit biologjikë dhe data e lindjes janë nxjerrë nga dokumentet zyrtare të identifikimit dhe certifikatat e lindjes të lëshuara nga një autoritet gjerman. Këto dokumente janë ende të vlefshme sot dhe janë baza për autorizimet e lojtarëve dhe licencat e klubit, pavarësisht nëse vendase ose të huaja, dhe sigurisht edhe për ekipet federale si kombëtarja gjermane U-21. Gjithashtu, ju lutemi vini re se lojtari dhe prindërit biologjikë të identifikuar në dokumentet e mësipërme kanë deklaruar tek ne, dhe në rastin e prindërve madje dhe palëve të treta, përmes deklaratave të betuara në kuadër të procedurave ligjore, se informacioni i përmbajtur në dokumentet zyrtare të sipërpërmendura është i saktë, natyrisht, për ne, Federatën Gjermane të Futbollit dhe klubin aktual të lojtarëve”, ka shkruar Dortmundi në një deklaratë të dërguar për “Sky Germany”.
Këtë sezon, Moukoko luan si huazim në Nica, për të cilin shënoi dy gola dhe dy asistime në 13 ndeshje në të gjitha garat, dhe për Dortmundin, me të cilin kontrata i skadon në verën e vitit 2025, në 99 ndeshje, ai arriti 18 gola dhe tetë asistime.
