Barcelona bie në “Principatë”, Arsenal dhe Atalanta ndajnë pikët
Këtë të enjte u luajtën ndeshjet e radhës në Ligën e Kampionëve. Atalanta dhe Arsenal barazuan pa gola, në ndeshjen e luajtur në Bergamo.
Barcelona pësoi disfatë 2-1 nga Monako. Garcia mori karton të kuq në minutën e 11-të, duke komplikuar llogaritë për katalanasit. Achliouche realizoi për vendasit nga Principata, ndërsa u kundërpërgjigj Jamal. Goli i Ilenikhena i dhuroi fitoren Monacos në fillimin e pjesës së dytë.
Atletiko Madridi triumfoi 2-1 ndaj Lajpcigut falë Grizmanit dhe Himenezit, duke bërë të pavlefshëm golin e sllovenit Seskos. Takimi tjetër, Brest-Sturm Graz u mbyll 2-1.
Fitore me goleadë e Leverkuzenit në ndeshjen e pare. Në Holandë, kampionët e Gjermanisë triumfuan 0-4 ndaj Fejnordit. Në pjesën e parë, Florian Virtz realizoi dopietë, ndërsa shënoi edhe Grimaldo. Në të 45-të, autogol i Vellenreuther.
Në Beograd, sfida Crvena Zvezda-Benfica u mbyll 1-2. Akturkoglu zhbllokoi llogaritë, sakaq Kokcu dyfishoi shifrat. Goli i Milsonit për skuadrën vendase në fundin e ndeshjes, shërbeu vetëm për statistikë.