Bashkimi Evropian me porosi për qeverinë VMRO–VLEN: Kërkohen ndryshime kushtetuese
Komisionerja e BE-së për Zgjerim, Marta Kos, pas takimit me ministrin e Punëve të Jashtme dhe Tregtisë së Jashtme, Timço Mucunski, ka theksuar rëndësinë që Maqedonia e Veriut të përmbushë detyrimet e mbetura për anëtarësim në Bashkimin Evropian, duke nënvizuar nevojën e ndryshimeve kushtetuese.
Në një postim në rrjetin social X, Kos shkruajti: “Diskutuam hapat e ardhshëm në rrugën evropiane të Maqedonisë së Veriut dhe rreth Planit të Rritjes së BE-së. Mbështetja ime për këtë proces mbetet e fortë. Përshëndes pajtueshmërinë e plotë të Shkupit me Politikën e Përbashkët të Jashtme dhe të Sigurisë së BE-së, si dhe ndihmën që vendi po i jep Ukrainës.”
Nga ana tjetër, ministri Mucunski, në një intervistë për revistën “Politico”, deklaroi se vendi nuk është i gatshëm të bëjë ndryshimet kushtetuese pa garanci të forta nga BE-ja.
“Frika jonë është se nëse i bëjmë këto ndryshime, pas gjashtë muajsh Bullgaria mund të dalë me kërkesa të reja që lidhen me historinë, identitetin ose gjuhën tonë. Ne duam siguri se kjo është kërkesa e fundit,” tha ai.
Megjithatë, Mucunski theksoi se Shkupi mbetet i përkushtuar ndaj reformave të tjera:
“Jemi të gatshëm të zbatojmë të gjitha reformat që kërkohen nga BE-ja, sepse ato janë të domosdoshme jo vetëm për procesin e integrimit, por edhe për vetë shoqërinë.”
Ai rikujtoi se Maqedonia e Veriut nisi procesin e integrimit së bashku me Kroacinë, por rrugët u ndanë:
“Ndërsa Kroacia sot është pjesë e BE-së, Shengenit dhe përdor euron, ne ende nuk i kemi hapur negociatat e anëtarësimit.”
Megjithatë, ministri mbetet optimist: “Unë besoj se zgjerimi i BE-së është ende i mundur. Vendi ynë ka potencial për të avancuar nëse bën reformat siç duhet.”
Mucunski gjithashtu theksoi mbështetjen që Maqedonia e Veriut i jep Ukrainës dhe rolin e saj në NATO, duke përmendur edhe faktin se vendi ka qenë i pari në rajon që ka nënshkruar një partneritet sigurie dhe mbrojtjeje me BE-në, madje para Mbretërisë së Bashkuar dhe Kanadasë. Flaka Media
