BDI dhe ASH sërish me akuza ndaj VLEN-it: Faji nuk është i opozitës shqiptare, por i VMRO-DPMNE-së

BDI dhe Aleanca për Shqiptarët kanë reaguar ashpër pas deklaratave të djeshme të kryetarit të ZNAM-it, Maksim Dimitrievski, i cili foli kundër shumicës së Badenterit, duke e quajtur atë të tejkaluar.

BDI: Është vazhdim i programit të VMRO-së për rrënimin e Marrëveshjes së Ohrit

Nga BDI thonë se deklaratat e Dimitrievskit janë pjesë e një fushate të orkestruar nga qeveria aktuale dhe partnerët e saj për të goditur themelet e Marrëveshjes së Ohrit dhe për ta kthyer shtetin pas në padrejtësi dhe përjashtim.

“Që nga dita e parë e mandatit, qeveria ka goditur shtyllat e barazisë:
• Shfuqizoi balancuesin dhe minoi përfaqësimin e drejtë të shqiptarëve dhe komuniteteve të tjera në institucionet shtetërore;
• Zhvlerësoi Marrëveshjen e Ohrit duke ia besuar implementimin e saj Ivan Stoillkoviçit, një figurë me bindje të njohura antishqiptare dhe putiniste;
• Fshiu në mënyrë kundërkushtetuese dhe kundërligjore diasporën nga përllogaritja, duke cenuar përfaqësimin në këshillat komunalë në zonat me shumicë shqiptare;
• Zvogëloi shqiptarët në përllogaritjet zyrtare dhe heshti para diskriminimit të hapur;
• Zhvlerësoi Inspektoratin e gjuhëve duke ia hequr statusin e personit juridik, duke minimizuar rolin e tij dhe duke e barazuar me një sektor të zakonshëm në Ministrinë e Drejtësisë;
• Shndërroi Agjencinë për zbatimin e gjuhëve në një institucion inekzistent, pa asnjë funksion real, përveç faktit që Stoillkoviçi i mori hapësirat fizike”, thuhet në reagimin e BDI-së.

Sipas kësaj partie, hapja e frontit kundër mekanizmit kushtetues të Badenterit nga Dimitrievski është sulm i drejtpërdrejtë ndaj barazisë dhe stabilitetit në vend.
“Kjo nuk është rastësi, është vazhdim i programit të VMRO-së, e cila para zgjedhjeve paralajmëroi hapur masa kundër multietnicitetit dhe Marrëveshjes së Ohrit. Partnerët e tyre të sotëm thjesht po zbatojnë këtë agjendë”, thekson BDI.

Partia e Ali Ahmetit paralajmëron se “tetori është afër dhe populli do të flasë fuqishëm në referendumin popullor, duke treguar se Marrëveshja e Ohrit nuk cenohet, dinjiteti i shqiptarëve nuk negociohet dhe se çdo përpjekje për përjashtim e nënçmim do të ndëshkohet rëndë”.

Aleanca për Shqiptarët: E keqja e VLEN-it ka emër – VMRO-DPMNE dhe partnerët e saj qeveritarë

Edhe Aleanca për Shqiptarët e Arben Taravarit ka dalë me reagim, duke theksuar se problemi i vërtetë nuk është opozita shqiptare, por aleatët qeveritarë të VLEN-it.

“Aleanca për Shqiptarët thekson se e keqja e VLEN-it nuk është opozita shqiptare dhe Aleanca për Shqiptarët, por partnerët e tyre qeveritarë – VMRO-DPMNE, ZNAM dhe Partia Demokratike Serbe e Ivan Stoilkoviçit. Me politikat e tyre antishqiptare, këta partnerë po e përdorin dhe po e eksploatojnë VLEN-in përditë, duke e nxjerrë keq para syve të shqiptarëve”, thuhet në reagim.

Sipas kësaj partie, diskriminimi dhe degradimi i shqiptarëve po ndodh hapur, ndërsa përfaqësuesit e VLEN-it heshtin.

“VLEN duhet të ndalë së sjelluri si opozitë, duke u amnistuar nga mëkatet e kësaj qeverie. E keqja e tyre ka emër – VMRO-DPMNE dhe partnerët qeveritarë – dhe fajin duhet ta kërkojnë aty, si dhe te zyrtarët e vet që po legjitimojnë politikat revanshiste ndaj shqiptarëve nga tutori i tyre, Hristijan Mickoski”, thuhet më tej.

Aleanca për Shqiptarët i bën thirrje VLEN-it që të marrë shembull nga Arben Taravari dhe të largohet sa më parë nga kjo qeveri:
“VLEN bën mirë të marrë shembull nga Aleanca për Shqiptarët dhe kryetari Arben Taravari dhe sa më parë të tërhiqet nga kjo qeveri ekstreme ndaj shqiptarëve. Përndryshe, përgjegjësia bie mbi ta dhe askush nuk do t’i amnistojë”.

Sipas ASh-së, nëse vazhdohet me çmontimin e Marrëveshjes së Ohrit dhe degradimin e arritjeve të shqiptarëve, nuk do të ketë më as vend për falje.

“VLEN duhet t’i kthehet popullit dhe të mos merret me shpifje e sulme ndaj opozitës shqiptare, sepse shqiptarët presin përgjegjësi dhe vizion, jo arsyetime për të qëndruar një ditë më tepër në pushtet. Tetori është afër dhe alarmi për ardhmërinë politike të VLEN-it është real”, përfundon reagimi i Aleancës për Shqiptarët. Flaka