BDI: Ndikimi i Beogradit në Maqedoni, shqetësim serioz
Bashkimi Demokratik për Integrim (BDI) shpreh shqetësim për, siç thotë, rritjen e ndikimit të Beogradit dhe të së ashtuquajturës “botë serbe” në Maqedoninë e Veriut.
Sipas BDI-së, ky ndikim është “më i madh se asnjëherë më parë” dhe përbën çështje që, sipas partisë, është evidentuar edhe në raporte dhe vlerësime ndërkombëtare.
BDI ka reaguar edhe ndaj deklaratave të presidentit serb Aleksandar Vuçiq, si dhe debatit për Tribunalin Penal Ndërkombëtar për ish-Jugosllavinë dhe Dhomat e Specializuara të Kosovës.
Partia thekson se këto dy institucione kanë baza të ndryshme juridike dhe institucionale dhe paralajmëron se nuk do të lejojë, siç shprehet, që “narrativat e importuara nga Beogradi” të ndikojnë në debatin politik në vend.
BDI vlerëson se zhvillimet e tilla mund të ndikojnë në marrëdhëniet ndëretnike, stabilitetin dhe orientimin evropian të Maqedonisë së Veriut.
