BDI reagon pas sulmit ndaj shqiptarit në Manastir: “Akt i turpshëm dhe dëshmi e nacionalizmit të institucionalizuar”
Bashkimi Demokratik për Integrim (BDI) ka reaguar ashpër pas incidentit të rëndë në qytetin e Manastirit, ku një qytetar shqiptar me shtetësi suedeze u sulmua fizikisht vetëm pse mbante veshur një bluzë me simbolin e shqiponjës.
Në deklaratën e saj zyrtare, BDI e cilëson ngjarjen si një akt të turpshëm dhe të rrezikshëm, duke theksuar se nuk bëhet fjalë për një incident të izoluar, por për një klimë të qëllimshme urrejtjeje dhe diskriminimi etnik që po nxitët sistematikisht nga partitë në pushtet dhe kreu shtetëror.
“Kur në tribuna, në prani të krerëve të shtetit, dëgjohen thirrje urrejtjeje dhe askush nuk mban përgjegjësi penale, kur përfaqësuesit më të lartë të pushtetit tallen duke thënë se ‘nuk kanë dëgjuar’ ato thirrje, atëherë kemi të bëjmë me një gjendje alarmante të institucionalizimit të urrejtjes,” – thuhet në reagimin e BDI-së.
BDI paralajmëron se qasja aktuale e shtetit është në kundërshtim të drejtpërdrejtë me frymën e Marrëveshjes së Ohrit dhe me vlerat themelore mbi të cilat është ndërtuar bashkëjetesa ndëretnike në Maqedoninë e Veriut.
“Sulmet mbi baza etnike, diskriminimi në institucione dhe fushatat e urrejtjes nuk lindin rastësisht – ato burojnë nga politika që vendos kolltukun përpara barazisë dhe relativizon dhunën në vend që ta ndalë atë,” – shton BDI.
Partia u bën thirrje institucioneve të drejtësisë që të reagojnë me masa të menjëhershme dhe pa kompromis, duke theksuar se çdo vonesë, çdo heshtje apo çdo përpjekje për të justifikuar këto akte do të konsiderohet si bashkëfajësi institucionale.
“BDI do të mbrojë çdo qytetar, çdo simbol dhe çdo të drejtë kushtetuese, sepse shteti nuk mund të ndërtohet mbi urrejtje, por mbi barazi dhe respekt të ndërsjellë,” – përfundon deklarata.(INA)
