Bislimi reagon pas raportimit të mediave në Serbi se ka refuzuar takimin trepalësh të kryenegociatorëve
Mediat në Serbi kanë raportuar se Kosova ka refuzuar takimin trepalësh të kryenegociatorëve në kuadër të dialogut Prishtinë – Beograd.
Pas kësaj ka reaguar zëvendëskryeministri i Kosovës, Besnik Bislimi, i cili tha se kjo është dezinformat dhe ka ftuar përfaqësuesin special të Bashkimit Evropian për dialogun ndërmjet Kosovës dhe Serbisë, Miroslav Lajçak, të reagojë.
“Ftoj Lajçakun të mohojë dezinformimin e qëllimshëm nga mediat serbe, ku thuhet në mënyrë të rreme se Kosova ka refuzuar takimin trepalësh të kryenegociatorëve”, shkruan ai në “X”.
Tutje, Bislimi ka thënë se Serbia u mundua të imponojë pika të rendit të ditës “të destinuara për konsum të brendshëm politik”.
“Për bisedimet e ardhshme të procesit të dialogut në Bruksel të vendosura për 17 shtator, Kosova ka pranuar një takim trepalësh sipas agjendës së caktuar nga ndërmjetësi. Fatkeqësisht, Serbia e refuzoi një takim të tillë duke u përpjekur të imponojë pika të rendit të ditës kryesisht për konsum politik të brendshëm”, ka thënë Bislimi në X.
