Bujar Osmani: Presim 150 mijë vota, pas zgjedhjeve Aleanca Kombëtare për Integrim do të jetë forca e dytë politike në vend
Kandidati për kryetar të Komunës së Çairit dhe një nga zërat kryesorë të Aleancës Kombëtare për Integrim (AKI), Bujar Osmani, në konferencën e sotme për shtyp deklaroi se koalicioni shqiptar i udhëhequr nga BDI synon një rezultat historik në zgjedhjet e ardhshme.
“Ne presim të marrim rreth 150 mijë vota si AKI, ndërsa rreth 50–60 mijë vota për VLEN,” u shpreh Osmani. Ai theksoi se sipas të gjitha vlerësimeve, AKI do të renditet forca e dytë në nivel shtetëror, ndërsa VLEN, siç tha ai, “do të mbetet e pesta ose e gjashta.”
“Për mua është me rëndësi që Aleanca Kombëtare për Integrim të dalë forca e dytë me më shumë vota në vend. Ky shtet duhet të funksionojë mbi partneritetin mes dy komuniteteve më të mëdha, shqiptar dhe maqedonas, duke respektuar të drejtat e të gjitha pakicave,” theksoi Osmani.
Sipas tij, këto zgjedhje kanë peshë të veçantë politike dhe do të përcaktojnë raportet e reja të forcave mes blloqeve etnike e politike në vend. Ai nënvizoi se më 19 tetor qytetarët duhet ta shprehin qartë vullnetin e tyre.
“Këto zgjedhje do të dëshmojnë se fituesi i parë do të jetë në bllokun maqedonas, ndërsa i dyti AKI, kurse VLEN do të mbetet e pesta ose e gjashta,” tha Osmani, duke shtuar: “Është me rëndësi që opinioni publik të reflektohet qartë në këtë ndarje të votës.” përfundoi ai.
