Bujar Osmani: Qeveria po zhvendos vendin nga BE drejt Beogradit dhe Moskës
Ish-ministri i Jashtëm dhe kandidati i BDI-së për Komunën e Çairit, Bujar Osmani, ka ngritur shqetësimin se në diskursin publik është zhdukur debati për integrimin europian, gjë që sipas tij nuk është e rastësishme, por pjesë e një strategjie të pushtetit aktual.
“Nuk është e rastësishme fakti që është zhdukur debati në diskursin publik për temën e BE-së. Unë mendoj se ky është qëllim. Është strategji. Pse? Se po u futët në kapitujt e BE-së do ju vijnë të gjithë mekanizmat e monitorimit. Do ua kontrollojnë punën e reformave. Do ua kontrollojnë punën e mjeteve financiare, të prokurimeve publike. Dhe këta nuk duan kontrolle nga BE. Duan kontroll autoritar të sistemit.” – deklaroi Osmani.
Ai paralajmëroi se Bashkimi Europian kërkon barazi mes bashkësive etnike, ndërsa sipas tij, qeveria aktuale ka nisur një proces të rrezikshëm të prishjes së Marrëveshjes së Ohrit dhe të përjashtimit të shqiptarëve nga jeta publike.
“BE do kërkojë barazi të bashkësive etnike. Këta kanë nisur një proces të demontimit të MO, të përjashtimit të shqiptarëve nga çdo sferë e jetës. Dhe lëvizje strategjike e vendit drejt botës serbe dhe botës ruse. Kjo është politika e kësaj qeverie. Ajo çfarë është trishtuese është bashkëpunimi i VLEN-it, me këtë politikë. Do të thotë, para syve tanë po ndodh lëvizja strategjike nga BE drejt Beogradit dhe Moskës dhe dikush po tenton ta legjitimojë.”
Osmani tha se zgjedhjet e ardhshme nuk janë vetëm lokale, por një referendum për orientimin gjeopolitik të vendit:
“Prandaj zgjedhjet e ardhme janë referendum. Prandaj është përshtypja se po flitet për tema kombëtare. Sepse, pa BE, si do të punoni me komunat. Ju mund të premtoni projekte milionëshe, por nëse nuk i keni fondet e BE-së, me çka do t’i financoni ato projekte? Nëse njerëzit ju ikin me pasaporta bullgare ose nesër me të Shqipërisë, për kë i rregulloni ato projekte nëpër komuna?”
Duke e lidhur temën europiane drejtpërdrejt me përditshmërinë e qytetarëve, Osmani shtoi se pa fondet dhe mekanizmat e BE-së, komunat nuk mund të zhvillohen:
“Prandaj BE është edhe temë komunale. Ne nuk do të ndalemi të flasim për këtë temë, derisa të bëhemi anëtar të BE-së.” Flaka Media
