Burri vritet me armë zjarri. Kush është viktima dhe autori – Detajet
Një sherr banal për një vend parkimi në fshatin Hajvali të Prishtinës ka përfunduar tragjikisht me vrasjen e 41-vjeçarit Muhamet Matoshi. Ngjarja e rëndë ndodhi mbrëmjen e së hënës, ku Matoshi u qëllua me një plumb në kokë nga bashkëfshatari i tij, Xhemajl Nuhiu. Siç raporton Sinjali, viktima ndërroi jetë në vendin e ngjarjes, ndërsa autori i dyshuar u largua menjëherë pas krimit.
Sipas informacioneve paraprake, konflikti mes dy burrave ka nisur rreth orës 21:40, duke u përshkallëzuar deri në përdorimin e armës së zjarrit. Pas denoncimit, Policia e Kosovës ka rrethuar vendin e ngjarjes, ka ngritur pika kontrolli dhe po punon intensivisht për zbardhjen e plotë të krimit dhe kapjen e autorit. Familjarët dhe miqtë e viktimës e kanë përshkruar Matoshin si një njeri të qetë dhe të paqtë.
Krimet e njëpasnjëshme tronditin Kosovën
Ky krim i rëndë vjen vetëm dy ditë pas një tjetër tragjedie në Gjilan, ku tre persona humbën jetën si pasojë e një sherri të lidhur me fajde. Selami Hasani, Abedin Hoxha dhe Edmond Hasani u vranë nga Mefail Shkodra dhe dy djemtë e tij, të cilët janë shpallur në kërkim për veprën penale “vrasje e rëndë”. Këto ngjarje të njëpasnjëshme kanë tronditur opinionin publik, duke vënë në qendër të vëmendjes problemet e sigurisë dhe dhunës.
