Derbi i madh në “Kamp Nou”, Llilla e Zhegrovës përball Atletikos në Madrid
Liga e Kampionëve sjell edhe 9 takime interesante në kuadër të javës së tretë. Mbrëmja e së martës dhuroi emocione të mëdha me ndeshje interesante, ku spikati fitorja me rikthim sensacional 5-2 e Real Madridit ndaj Borusia Dortmundit.
Megjithatë, edhe sot janë në orar për t’u zhvilluar shumë takime interesante, ku vëmendjen kryesore pritet ta rrëmbej përballja mes dy gjigantëve evropianë, Barcelona dhe Bajern Munihu. Ndeshje interesante pritet të jetë edhe ajo në mes të Atletiko Madridit dhe Lille-s të Edon Zhegrovës, si dhe Lajpcigut kundër Liverpullit.
Ndërkohë tërheq vëmendja ndeshja në stadiumin “Etihad”, ku Man. Siti pret Sparta Pragën e Albion Rrahmanit, Ermal Krasniqit, Indrit Tucit dhe Qazim Laçit.
Në përballjet tjera, Atalanta e Berat Gjimshitit pret Seltikun, Bresti është nikoqir i Bajer Leverkuzenit të Granit Xhakës, Benfika luan me Fejnordin, Salzburg sfidon Dinamo Zagrebin e Arjan Ademit dhe Interi i Kristjan Asllanit që luan në udhëtim te Jang Bojsi.
Dy ndeshje zhvillohen në orën 18:45, ndërsa shtatë takimet tjera nga ora 21:00.