
Ditmire Shehu e vetme kundër shumicës maqedonase në KShZ, Abdush Demiri i VLEN-it, mungoi
Komisioni Shtetëror i Zgjedhjeve në mbledhjen e saj të 130-të diskutoi, ndër të tjera, edhe për udhëzimin mbi plotësimin e formularëve për listat e kandidatëve për këshilltarë komunal nëpër komuna dhe në qytetin e Shkupit. Pika e katërt e rendit të ditës u ndërpre, pasi me kërkesë të anëtares Ditmire Shehu u vendos të kërkohet mendim me shkrim nga Sektori Juridik i KShZ-së, shkruan Flaka Media.
Ky udhëzim duhej të miratohej në bazë të vendimit të Qeverisë, e cila përcaktoi numrin e këshilltarëve komunalë, edhe pse kjo çështje është e rregulluar me nenin 34 të Ligjit për Vetëqeverisje Lokale.
Anëtarja e KShZ-së, Ditmire Shehu, theksoi se meqenëse Gjykata Kushtetuese ka abroguar metodologjinë e regjistrimit, numri i këshilltarëve duhet të përcaktohet mbi bazën e numrit të përgjithshëm të banorëve:
“Qeveria nuk i ka ndarë qytetarët në rezidentë dhe jo rezidentë. Prandaj, më duket absurde që numri i këshilltarëve në vendimin e qeverisë të mbështetet mbi këtë dallim. Në nenin 34 të Ligjit për Vetëqeverisje Lokale është shumë e qartë se numri i këshilltarëve përcaktohet në bazë të numrit të banorëve që jetojnë në komunë, e jo në bazë të rezidentëve dhe jo rezidentëve,” – deklaroi Shehu.
Në vazhdimin e seancës të mbajtur më 22 gusht, në mungesë të anëtarit shqiptar dhe nënkryetarit të KShZ-së, Abdush Demiri, udhëzimi u miratua me pesë vota për dhe një kundër. Me këtë rast, u mor parasysh vendimi i Qeverisë dhe jo dispozitat e Ligjit për Vetëqeverisje Lokale.
E vetmja që votoi kundër ishte Ditmire Shehu, anëtare nga radhët e BDI-së, e cila theksoi se ky udhëzim nuk mund të miratohet mbi bazën e një vendimi qeveritar që llogarit vetëm banorët rezidentë, duke përjashtuar diasporën. Kjo, sipas saj, sjell ulje të numrit të këshilltarëve në 14 komuna. Shehu paralajmëroi se do ta kontestojë udhëzimin para Gjykatës Administrative.
Nga ana tjetër, Aleanca për Shqiptarët e Ziadin Selës njoftoi se vendimin e KShZ-së do ta çojë në Gjykatën Kushtetuese.
Vendimi i Qeverisë erdhi pas rezultateve të regjistrimit të popullsisë, që treguan ulje të numrit të banorëve. Në bazë të Ligjit për Vetëqeverisje Lokale u vendos për zvogëlim të numrit të këshilltarëve në disa komuna, ku kjo u pa e domosdoshme. Flaka Media