Donaruma, “pika” e kritikave për disfatën e PSZH në Paris
Humbja e PSZH-së në shtëpi përballë Barcelonës ka vënë në epiqendër të vëmendjes portierin Xhanluixhi Donaruma. Italiani nuk u shfaq shumë i sigurt në veprimet e tij dhe nuk largoi topin si duhej te goli i parë i Rafinjas. Por ajo që u ka rënë më shumë në sy të gjithëve, ishte lehtësia me të cilën Kristiansen shënoi në portën e tij për të vulosur golin e 3-2.
Sipas Klarens Sedorf, faji ëshsë i lojtarëve që nuk shkuan te shtyllat.
“Është e çuditshme që nuk shkoi askush te shtyllat, kjo e bën portierin më pak të sigurt në dalje. Në raste të tilla rri në vend”, tha ai për “Prime Video” pas ndeshjes duke argumentuar pse Donaruma nuk doli në atë moment të grushtonte topin.
Por ish-portieri i Interit, Hulio Sezar, mendon se është vetëm faji i gardianit.
“Në zonën e vogël duhet të dalësh, edhe për faktin se ai është i gjatë thuajse dy metra”, shpjegoi braziliani.