Drita Çomo, historia tragjike e vajzës së Liri Belishovës që vdiq me kancer e vetmuar në komunizëm, Autoriteti hap dosjen

Nuk ka një personazh të dytë si Drita Çomo, historinë e të cilës e lexon dhe të dhemb shpirti. Dhe mandej, kërkon arsye kur “bota arsye nuk ka” për të kuptuar sa mizor ishte regjimi diktatorial i Hoxhës. Ndaj sot, gjithë vëmendja, ishte përqëndruar te Autoriteti i Dosjeve, aty ku kryetarja Genta Sula në kuadër të muajit për gruan, marsin, mblodhi miq, shokë, familjarë, studiues e shkrimtarë për të folur për të vetmen vepër që Drita Çomo na la në gjallje: “Dritë që vjen nga Humnera”.

Libri që la pas Drita Çomo dhe dosja e survejimit që hapet për herë të parë, për studiuesit, me lejen e familjarëve, vjen në përkujtim të 8 Marsit për të nderuar përpjekjet e vajzave dhe grave në komunizëm.

Klubi i librit targeton mësuesit dhe mundohet që përmes memuaristikës dhe lidhjes me dokumentet e Ish-Sigurimit të Shtetit t’i japim mësuesve jo vetëm fakte historike, por edhe kontekst, përjetim, për t’u hedhur në një platformë për diskutim.

Libri i Drita Çomos është si ajo lulja që don ta këpusësh, po mbas asaj luleje na dalin rrënjë të thella e të thella, për fatin e historisë së saj, raportet që ajo krijoi me njerëzit, shpresa e saj për të jetuar, fati tragjik i dy prindërve që ëndërruan një ëndërr të bukur, por që për fatin e keq nuk rezultoi aq e bukur, por edhe i bëri viktimë. Le të urojmë që kohë të tilla mos të përsëriten më”, tha Genta Sula në fillim të aktivitetit.

Drita Çomo u lind në Tiranë në 19 mars 1958. Vajza e Liri Belishovës, në moshën 2 vjeçare u internua për shkak të dënimit të nënës së saj dhe dënimit të të atit, Maqo Como, të dy, ish funksionarë të pushtetit komunist.

Një pjesë të fëmijërisë dhe të adoleshencës e kaloi e internuar në Kuç të Vlorës e më pas në Progonat të Kurveleshit. Së fundi u internua në Cërrik, ku dhe mbaroi shkollën e mesme, por për shkak të sëmundjes së rëndë dhe të keqdashjes, nuk arriti të kryente maturën.

Vdiq fill e vetme në moshë fare të re, më 19 shkurt 1981, në Spitalin Onkologjik të Tiranës, ku as në grahmat e fundit nuk iu lejua që të kishte pranë të ëmën. Ajo la të shkruar një ditar, i cili është dëshmi për ngjarjet e ndodhura në izolim si dhe dhjetra poema e poezi të shkruara në vitet 1975-1981, të cilat janë një histori vuajtjesh, dhimbjesh dhe shprese, të cilat u bënë pjesë e diskutimeve në Klubin e Librit, mbajtur në praninë e profesorëve dhe mësuesve të historisë, gjuhës dhe letërsisë, mikes së saj të rinisë, aktores së mirënjohur Rajmonda Bulku dhe vëllait të saj, Petrit Çomo.

𝐃𝐫. 𝐄𝐝𝐥𝐢𝐫 𝐎𝐫𝐡𝐚𝐧𝐢 nga  AIDSSH  bëri një paraqitje të gjetjeve arkivore nga dosja  e përndjekjes së hartuar nga Ish-Sigurimi i Shtetit, si dhe disa  momente nga dosja e krijuar mbi nënën e saj Liri Belishova.

“Dosja është hapur kur ajo kishte mbushur 16 vjeç dhe vazhdonte vitin e dytë të gjimnazit në qytetin e Cërrikut ku ajo banonte e internuar me të ëmën Liri Belishova dhe të vëllain, Petrit Çomo. Dosja nis me një shënim të operativit të sektorit të hekurudhës Fier-Ballsh, ku gjimnazi i saj  mori pjesë në aksionin për ndërtimin e hekurudhës në periudhën qershor 1974.

Survejimi i famijes dhe të dhënat me Teknikë Operative (përgjim të bisedave nëne e bijë në shtëpi) ishin të mjaftueshme, sipas sigurimit që Drita Çomo të vendosej në përpunim paraprak për agjitacion e propagandë. Ndaj saj u hartua dhe miratua edhe plani i masave agjenturalo-operative”, ku në bashkëpunin përfshiheshin edhe nxënës të klasës së saj, të cilët raportonin për mendimet jashtë klisheve ideologjike dhe referatet që Drita krijonte sipas temave të orës së letërssië, apo edhe të fizikës. Në datën 1.4.1977 merret vendimi për arkivimin e dosjes 2A për shkak të sëmundjes. Por përsëri tre vjet më vonë ndërsa lëngonte në shtratin e vdekjes në 30.11.1980 jepet vendimi për ta marrë në përpunim 2B me asyen se shfaq tendencën “për agjitacion e propagandë armiqësore, për drejtimin antiparti duke marrë masa për kontrollin e saj.” Me vdekjen e saj dosja arkivohet në datën 18.3.1983.”

𝐏𝐞𝐭𝐫𝐢𝐭 𝐂̧𝐨𝐦𝐨, vëllai i Drita Çomos solli disa dëshmi nga jeta në internim dhe vitet e kaluara me Dritën. “Mua më vjen mirë që ajo kujtohet edhe pse vdiq e re. Ajo la pas këto krijime që e kthyen historinë e saj në qëndër të vëmendjes dhe uroj që edhe për të tjerë, si ajo që nuk patën fat të realizoheshin për shkak të pengesave ideologjike të ketë sa më shumë ngjarje të tilla kujtese.”

𝐑𝐚𝐢𝐦𝐨𝐧𝐝𝐚 𝐁𝐮𝐥𝐤𝐮, aktorja e njohur dhe e dashur për publikun,  shoqe e rinisë së Drita Çomos, risolli për të pranishmit kujtimet dhe mbresa nga shoqëria e saj : “Drita sa jetë të shkurtër pati po aq edhe jehonë. Në atë kohë,  akoma nuk kishin ardhur vitet 90, ajo ishte një zë i fuqishëm në atë kohë, ajo ishte fuqishëm në atë qytet, ishte fuqishëm në shoqëri , ajo ishte fuqishëm në kujtimet tona. Ishte shumë intelektuale, shumë e kulturuar, ne merrnim dhe jepnim libra. Burrneshë, fliste hapur. Ka bërë veprime shumë të guximshme. Kemi qenë njëherë në një aksion në Fier. Ishim 15 vjeç dhe kishim 2 djem të një ruseje, babin të futur në burg, inxhinier. Dhe ai kishte vajtur të takonte babin e tij në burgun e Ballshit që ishte afër se aty po bënim dhe ne. I bënë një mbledhje të tmerrshme atje atij djali, e persekutuan, ne që rrinim të gjithë. Si vajte ti te armiku në burg? Vetëm Drita guxoi, nga ne, që në atë kohë nuk mund të të mbronte një njeri që ishte  persekutuar vetë sepse rrënohej fare. Dhe vetëm ajo guxoj. Dhe i tha atyre thjeshtë me atë mençurinë e vetë dhe thjeshtësinë : Çfarë  ka bërë Aliosha sepse ka vajtur të takojë babanë në burg, babanë e tij.”