Edhe një largim nga LD-ja e Izet Mexhitit – Agron Llokmani i bashkohet Aleancës

Profesor Agron Llokmani, ish-koordinator i Lidhjes Demokratike (LD) për degën e Tearcës, i është bashkuar Aleancës për Shqiptarët dhe koalicionit “Aleanca Kombëtare për Integrim”, njofton Flaka

Lajmin e ka bërë të ditur kreu i Aleancës, Arben Taravari, i cili theksoi se partia vetëm sa po forcohet me figura të reja.

“Jemi të lumtur që profesor Agron Llokmani i bashkohet Aleancës më të madhe në vend, e cila vetëm rritet. Në zgjedhjet parlamentare profesor Agroni ishte pjesë e LD-së, por si një njeri me vizion ai është bërë pjesë e ekipit tonë që do të jetë ekipi fitues i tetorit: Aleanca Kombëtare për Integrim. T’gjithë n’Këmbë për Ardhmërinë!”, u shpreh Taravari.

Kandidati për kryetar të Komunës së Tearcës, Nazim Taipi, gjithashtu e përshëndeti aderimin e Llokmanit.

“Mirë se na vjen profesor Agron Llokmani në familjen politike të Aleancës për Shqiptarët dhe koalicionit ‘Aleanca Kombëtare për Integrim’! Vizioni ynë për Komunën e Tearcës sot bëhet edhe më i fortë me bashkimin e profesorit të nderuar, i cili në zgjedhjet parlamentare ka qenë koordinator i Lidhjes Demokratike për degën e Tearcës,” deklaroi Taipi. Flaka Media