Filipçe: VMRO-DPMNE po humb mbi 100 mijë vota
Kryetari i LSDM-së, Venko Filipçe, ka akuzuar qeverinë e drejtuar nga VMRO-DPMNE se me vetëdije po krijon terren për parregullsi zgjedhore, pasi sipas tij partia e kryeministrit Hristijan Mickoski po humb mbështetjen qytetare.
“Qeveria po i hap me vetëdije dyert për parregullsi zgjedhore, sepse VMRO-DPMNE po humbet një numër të madh votash. Mbi 100 mijë, diku rreth 120 mijë vota. Ata po kërkojnë instrumente që mund ta rrezikojnë seriozisht procesin zgjedhor”, tha Filipçe.
Ai reagoi edhe ndaj deklaratës së kryeministrit Mickoski, i cili një vit pas formimit të qeverisë së re vazhdon të fajësojë LSDM-në dhe BDI-në për gjendjen në vend.
“E dëgjova deklaratën e kryeministrit dhe më vjen keq që dëgjova një deklaratë të tillë. Unë besoj se është rezultat i një paaftësie të plotë dhe mungesës së kapacitetit për të menaxhuar dhe udhëhequr një vend”, theksoi Filipçe.
