Fushatë para fushatës në Maqedoninë e Veriut: Hyrje e ashpër, goditje poshtë brezit

Dyshime për abuzime të pasankcionuara të burimeve publike, mesazhe të supozuara nga VMRO-DPMNE -ja për ngrohjen e marrëdhënieve me BDI-në, kush ka bërë më shumë e kush ka bërë më pak për shqiptarët… E gjithë kjo është pjesë e “fushatës para fushatës”, një muaj para fillimit zyrtar të saj. Analistët kishin parashikuar tashmë një fushatë të ashpër dhe të pa pastër, por nuk prisnin që fillimi para saj të ishte i tillë – me goditje poshtë brezit dhe me manipulime, transmeton Portalb.mk nga Dojçe Vele (DW).

Kandidati për kryetar të Komunës së Çairit, Bujar Osmani, e ndezi “fitilin“ duke e komentuar deklaratën e kryeministrit Hristijan Mickoski, se në këto zgjedhje lokale opozita do të humbasë në të gjitha komunat dhe tha se pret që BDI-ja të jetë një opozitë konstruktive në lidhje me shumicën e Badinter-it, sidomos kur bëhet fjalë për ndryshimet në Kodin Zgjedhor. Osmani u përpoq të ngjallte dyshime te VLEN-i se partneri i tyre VMRO-DPMNE prapa shpine dëshiron të ngrohë marrëdhëniet me BDI-në.

“Kryeministri jep mesazhe të tilla publikisht duke menduar se kjo do t’u ndihmojë partnerëve të koalicionit, por ai nuk dërgon mesazhe të tilla përmes kanaleve private. Të tjera janë mesazhet që i dërgohen BDI-së për t’i ngrohur marrëdhëniet. BDI-ja nuk do të bëjë pazar për të hyrë në Qeveri, njëri largohet, tjetri hyn”, tha Osmani, duke theksuar se shqiptarët nuk do të lejojnë askënd t’i trajtojë si një “masë amorfe”, e që Kryeministri të vendosë se kush do t’i përfaqësojë ata në Qeveri.

Simbolika e fletës së bardhë
VMRO-DPMNE iu përgjigj menjëherë këtyre akuzave.

“Bujar Osmanit ose nuk i kanë thënë, ose nuk don që ta kujtojë kohën kur ekipi negociator i BDI-së la një fletë të bardhë para VMRO-DPMNE-së, i gatshëm të përmbushë çdo kërkesë vetëm që të mund të mbeten në qeverinë që u mund në zgjedhje. Atëkohë udhëheqësit e BDI-së, të cilët tani po rrahin gjoksin kaq fort, nuk dukeshin dhe nuk silleshin kaq trimërisht. Osmani mund të shtiret si parimor, por e vërteta është e qartë: udhëheqësia e BDI-së është shndërruar në një elitë milionerësh, ndërsa populli jeton në varfëri. Kjo është arsyeja pse sot BDI u premton funksione dhe hyrje në qeveri anëtarëve të saj të zhgënjyer, duke shpresuar se ata do ta fshehin korrupsionin dhe marrëveshjet e tyre kriminale”, thanë nga VMRO–DPMNE në një deklaratë.

Nga partia theksuan se kur Osmani flet për një “masë amorfe”, ky në të vërtetë është thelbi i problemit.

“Plot 20 vjet BDI-ja e ka trajtuar komunitetin shqiptar si një masë amorfe – si një makinë votimi për bizneset dhe marrëveshjet e tyre kriminale”, u përgjigjën nga VMRO–DPMNE.

Përtej këtij shkëmbimi publik akuzash, burime në bllokun shqiptar spekulojnë se Osmani me “kontributin” e tij në propozimin francez është bërë një barrë ose pengesë për mundësinë e BDI-së për t’i rigjallëruar marrëdhëniet me udhëheqësinë e VMRO-DPMNE-së, ndërsa ata e barazojnë inkurajimin e partisë për kandidaturën e tij me “puthjen e Judës”.

“Kthimi në shtegun qendror për BDI-në është më domethënës sesa një humbja në një komunë, sidomos nëse kjo humbje hap rrugën përmes defronizimit të një personi”, thonë këto burime.

Se kush do të fitojë dhe kush do të humbasë këtë gjë do e vendosin votuesit, edhe pse kuzhinat e partive ose makinat e propagandës po e përgatisin perceptimin me intensitet të pandërprerë, secili për fitoren e vet.

Në distancë higjienike
Në atmosferën e nxehtë parazgjedhore cak i sulmeve, gënjeshtrave dhe akuzave janë edhe ata që nuk janë pjesëmarrës të drejtpërdrejtë në garën zgjedhore. Zëvendëskryeministri përgjegjës për qeverisje të mirë, Arben Fetai, u ankua se makina propagandistike e BDI-së dhe mbështetësit e saj përmes profileve të rreme kanë nisur një fushatë të egër kundër tij. Ai u përgjigj publikisht se është krenar për tre gjëra në politikë: nuk ka keqpërdorur asnjë denar të burimeve publike, askush nuk mund ta kushtëzojë, shantazhojë ose ndikojë në vendimet e tij dhe është i vetmi që nuk ka pasur kurrë kontakt, bashkëpunim apo kompromis me BDI-në dhe kryetarin e saj.

“Kam mbajtur dhe do të mbaj një distancë higjienike prej tyre, sepse t’u afrohesh do të thotë të njollosesh nga prishja e tyre morale”, tha Fetai.

Latif Arifi, koordinatori kombëtar për komunikim dhe media në qeveri, vlerësoi se fakti që BDI-ja sot është në opozitë nuk është rastësi, por sepse qytetarët kanë ndëshkuar një model të lodhur qeverisjeje, i cili për 20 vjet nuk ka sjellë as zhvillim dhe as barazi, por vetëm korrupsion, pasurim personal dhe ngecje.

“Në këto zgjedhje lokale shqiptarët kanë mundësinë ta përfundojnë këtë cikël. BDI-ja duhet të kalojë në opozitë edhe në nivel lokal. Dhe kjo nuk është hakmarrje politike, por një domosdoshmëri shoqërore. Me katër vjet të kaluara në opozitë kjo parti mund të ketë një shans për t’u pastruar nga brenda, për t’u reformuar dhe për të dalë me njerëz të rinj dhe profesionistë. Sepse shqiptarët janë lodhur duke i parë të njëjtat fytyra në skenë gjithë jetën e tyre”, shkroi Arifi në një kollumnë.

Shkaqe dhe pasoja
Në periudhën parazgjedhore po bëhet edhe një demistifikim joformal i arsyeve se pse Aleanca për Shqiptarët e udhëhequr nga Arben Taravari u largua nga koalicioni qeverisës dhe iu bashkua Frontit Evropian. Në qendër të vëmendjes është kontrata e dështuar me “Gjoka Construction” – kompania nga Shqipëria që duhej të menaxhonte parkingun e Qendrës Klinike. Sipas VLEN-it, Таravari nuk ka dalë nga Qeveria për shkak të parimeve apo për shkak të interesit të qytetarëve, por për shkak të marrëveshjeve të ndyra personale që e zbuluan fytyrën e tij të vërtetë: një politikan i gatshëm të shesë gjithçka për përfitime personale.

“Duke i shërbyer Ahmetit dhe Grubit ai i tradhtoi idealet për të cilat dikur thirrej dhe e identifikoi veten me ata që qytetarët shqiptarë i ndëshkuan më 8 maj”, theksuan nga VLEN.

ASh, dega e Taravarit, u bëri thirrje autoriteteve përmes institucioneve që të paraqesin publikisht të paktën një lidhje midis investitorit nga Shqipëria dhe Taravarit.

Zgjedhjet lokale do të të mbahen më 19 tetor – rrethi i parë dhe 2 nëntor – rrethi i dytë.

Sipas afateve të përcaktuara nga Komisioni Shtetëror i Zgjedhjeve, fushata zgjedhore për raundin e parë fillon më 29 shtator dhe do të zgjasë vazhdimisht deri më 17 tetor, ndërsa fushata për raundin e dytë zgjedhor do të zgjasë deri më 31 tetor. Flaka Media