Gazetari Kosovar Mirlind Behluli: Ali Ahmeti i ofendoi shqiptarët e Shkupit
Gazetari i mirënjohur kosovar, Mirlind Behluli, ka reaguar ashpër ndaj deklaratës së Ali Ahmetit i cili e quajti pjesën shqiptare të Shkupit si “Kandahar”.
“Ali Ahmeti i ofendoi shqiptarët e Shkupit, duke thënë që e kanë bo Çairin si Kandahar. Ndërsa i lavdëroi maqedonët për “ndërtime estetike”. Kjo akuzë i mirëmban qëndrimet raciste të nacionalistëve maqedonë. Çairi me çarshinë e bukur është pjesa më e mirë e Shkupit”, publikoi Behluli.
Gazetari thotë se vjen shpesh në Shkup dhe Çarshia e Vjetër e Shkupit është pjesa më e bukur e qytetit, e vizituar nga turistë nga mbarë bota. Ndërsa, pjesa që i ka pëlqyer Ahmetit, pra pjesa maqedonase e Shkupit, është e mbushur me përmendore antishqiptare si pjesë e projektit “Shkupi 2014”.
“Nuk e di se a jam tu e dëgju Ali Ahmetin apo Levicën?!”, thotë gazetari Behluli.
Sipas tij, kjo akuzë e Ali Ahmetit ka përbrenda edhe islamofobinë. /VOXAL/
