Genc Selmani denoncon: Punësim me lista selektive në Spitalin e Kërçovës – diskriminim politik dhe etnik

Genc Selmani, ish-drejtor i Spitalit të Përgjithshëm të Kërçovës dhe aktualisht kryetar i degës së Aleancës për Shqiptarët në Kërçovë, ka reaguar publikisht duke denoncuar shkelje të rënda të parimeve të barazisë dhe meritokracisë në konkursin e fundit për punësim në këtë institucion shëndetësor.

Sipas Selmanit, pavarësisht se ai ishte renditur i katërti në listë, bashkë me një tjetër kandidat të renditur të tretin, të dy nuk u përfshinë në listën e të punësuarve. Në vend të tyre, sipas tij, u zgjodhën kandidatë që ishin renditur më poshtë, konkretisht i gjashti dhe i shtati, për të cilët ekzistojnë dyshime serioze mbi plotësimin e kushteve ligjore, si licenca dhe stazhi i obliguar.

“Ky vendim është shkelje flagrante e meritokracisë, diskriminues në baza etnike dhe politike, si dhe një goditje e rëndë për të rinjtë profesionistë shqiptarë që besojnë në drejtësi dhe mundësitë e barabarta”, thekson Selmani.

Ai kërkon reagim të menjëhershëm nga:

• Komisioni Shtetëror për Vendim në Procedura Administrative dhe Procedurën e Punësimit në Shkallë të Dytë – për anulimin e vendimit të padrejtë,

• Komiteti i Helsinkit për të Drejtat e Njeriut – për hetimin dhe ndjekjen e rastit si diskriminim institucional,

• Avokati i Popullit – për mbrojtjen e të drejtave të tij dhe të çdo qytetari që anashkalohet për arsye jo-profesionale.

Selmani thekson se ky rast nuk është vetëm çështje personale, por “luftë për drejtësi, barazi dhe dinjitet në punësim”, duke nënvizuar se rasti tashmë po bëhet publik edhe përmes mediave.